CNN-მა კომენტატორი ჯეფრი ლორდი twitter-ზე გამოქვეყნებული ნაცისტური მისალმების გამო სამსახურიდან დაითხოვა - წერს Washington Post-ი. განცხადება ცნობილი გახდა რამდენიმე საათში მას შემდეგ, რაც ლიბერალური მიმართულების ჯგუფს, Media Matters, ლორდი ნაცისტური სლოგანით, "Sieg Heil!-ით", მიესალმა.

Media Matters არის კვლევითი ცენტრი, რომელიც ამერიკულ მედიაში ამონიტორინგებს კონსერვატიული ძალების მიერ გავრცელებულ ინფორმაციასა და მათ შესაბამისობას სინამდვილესთან.

სატელეფონო ინტერვიუში ჯეფრი ლორდმა განაცხადა, რომ აფასებს CNN-სა და მის ჟურნალისტებს, მაგრამ არხის გადაწყვეტილებას არ ეთანხმება. მისი თქმით, ტვიტით ნაციზმს კი არ უჭერს მხარს, არამედ დასცინის Media Matters-სა და მის მიერ ფოქს ნიუსის კონსერვატორი ტელეწამყვანის შონ ჰანიტის ბოიკოტირებას.

ჯეფრი ლორდმა საკუთარ თავს "პირველი შესწორების ფუნდამენტალისტი" უწოდა. "ჩემი აზრით, CNN-მა პირველი შესწორება დაარღვია. მე ამას არ ვეთანხმები," - ამბობს ლორდი. აშშ-ს კონსტიტუციის პირველი შესწორება უზრუნველყოფს მოქალაქეთა სიტყვის, პრესისა და რწმენის გამოხატვის თავისუფლებას.

სამსახურიდან გათავისუფლების დეტალების გამჟღავნებისგან ჯეფრი ლორდმა თავი შეიკავა და განაცხადა, რომ სურს, პირადი საუბარი საიდუმლოდ შეინახოს.

აშშ-ის საპრეზიდენტო არჩევნების პერიოდში CNN-ის ეთერში ჯეფრი ლორდს დონალდ ტრამპისთვის არაერთხელ დაუჭერია მხარი. კომენტატორმა მუშაობა CNN-ზე მას შემდეგ დაიწყო, რაც ტრამპმა საპრეზიდენტო არჩევნებზე თავისი კანდიდატურა წარმოადგინა.