მომღერალ, მსახიობ და ბიზნესვუმენ სელენა გომეზს დატვირთული გრაფიკი აქვს, თუმცა თავისი ახალგაზრდა ფანებისთვის დრო მაინც გამოძებნა.

გომეზი კოლორადოს შტატის ქალაქ ტელურაიდში გამართულ კინოფესტივალზე იმყოფებოდა, რომელიც პარასკევს დაიწყო და დღეს დასრულდება. როგორც აღმოჩნდა, ამ ქალაქის ერთ-ერთი საშუალო სკოლის ფრენბურთის გუნდში გომეზს ბევრი ფანი ჰყავს — ბავშვებმა ქალაქში ბანერი გამოაკრეს და მომღერალს სტუმრობა და მათთვის აშშ-ს ეროვნული ჰიმნის შესრულება სთხოვეს.

ფოტო: CHSAA

"სელენა გომეზ, გთხოვთ, შეასრულო ეროვნული ჰიმნი ჩვენს რომელიმე თამაშზე: პარასკევს 6:00-ზე ან შაბათს 1:00-ზე — ტელურაიდის საშუალო სკოლა" — ვკითხულობთ პოსტერზე. მომღერალმა მოსწავლეებს სურვილი აუსრულა და მათ სკოლას მართლაც ესტუმრა.

მომღერალმა ამის შესახებ საკუთარ ინსტაგრამზეც დაპოსტა. "მათ მთხოვეს და სხვანაირად არ შემეძლო. ტელურაიდში პირველად ვარ!" — დაწერა გომეზმა.

გავრცელებული ფოტოებიდან ჩანს, რომ მან თავის ფანებს ავტოგრაფები დაურიგა და მათთან ერთად ბევრი ფოტოც გადაიღო.

ფოტო: CHSAA

ფოტო: Selena Gomez/ Instagram