სოფლის მეურნეობის სამინისტროს განცხადებით, კვერცხის 60 ნიმუშის ლაბორატორიული კვლევისას დარღვევა არცერთში არ გამოვლენილა.

მათი ცნობით, მიმდინარე წელს, მეფრინველეობის ფერმებსა და კვერცხის მწარმოებელ ბიზნესოპერატორებთან 81 შემოწმება (ინსპექტირება, დოკუმენტური შემოწმება, გადამოწმება) ჩატარდა.

კვლევის თანახმად, მეფრინველეობასა და კვერცხის წარმოებაში ჩატარებული სახელმწიფო კონტროლის შედეგად, სულ გამოვლინდა ექვსი შეუსაბამობა, რომელიც ეტიკეტირების წესის დარღვევას უკავშირდება.

სოფლის მეურნეობის სამინისტროს ინფორმაციით, საქართველოს მოსახლეობა წლიურად დაახლოებით 550 მლნ ცალ სასურსათო კვერცხს მოიხმარს. 2016 წლის მონაცემით, საქართველოში 590 მლნ კვერცხი იქნა წარმოებული.