პროკურატურამ ვიტალი გუგუჩიას ბრალი ოფიციალურად წარუდგინა. უწყება მას ჟურნალისტისთვის პროფესიულ საქმიანობაში უკანონოდ ხელის შეშლასა და ძალადობას ედავება.

პროკურატურის განცხადებით, ბრალდებულმა "პოსტივის"-ის ჟურნალისტისა და ოპერატორის მიმართ სიტყვიერი აგრესია გამოხატა, რის შემდგომაც ოპერატორს ფიზიკური შეურაცხყოფა მიაყენა. აღნიშნულის შედეგად, გამოძიების ვერსიით, მედიის წარმომადგენლებმა ადგილზე პროფესიული საქმიანობის განხორციელება ვეღარ შეძლეს.

„სპეციალური საგამოძიებო სამსახურის მიერ ჩატარებული გამოძიებით დადგინდა, რომ 2024 წლის 31 მაისს, ტელეკომპანია „პოს ტვ“-ის ჟურნალისტი ნ.ბ. და ოპერატორი ბ.დ., ვ.გ.-სთან ინტერვიუს ჩაწერის მიზნით, ზუგდიდის მუნიციპალიტეტის სოფელ კახათში, რესპონდენტის საცხოვრებელი სახლის მიმდებარე ტერიტორიაზე მივიდნენ. ტელეკომპანია „POSTV“-ის სარედაქციო პოლიტიკის მოწინააღმდეგე ვ.გ.-მ ჟურნალისტისა და ოპერატორის მიმართ სიტყვიერი აგრესია გამოხატა, რის შემდგომაც ოპერატორს ფიზიკური შეურაცხყოფა მიაყენა. აღნიშნულის შედეგად, მედიის წარმომადგენლებმა ადგილზე პროფესიული საქმიანობის განხორციელება ვერ შეძლეს”, – ნათქვამია პროკურატურის განცხადებაში.

ოჯახი ამ ყველაფერს პოლიტიკურ დევნად აფასებს.

ვიტალი გუგუჩია და მირანდა ჯობავა საზოგადოებამ, მაისში გაიცნო. 29 მაისს, მათ მარკეტში "ხალხის ძალის" დეპუტატი, ვიქტორ ჯაფარიძე ბოდიშის მოსახდელად და "ნასროლი ფორთოხლის" თანხის ასანაზღაურებლად მივიდა, მან ფორთოხალი იმ მოქალაქეს ესროლა, რომელმაც წინა დღით, რუსული კანონის მიღების შემდეგ პარლამენტიდან მომავალი დეპუტატების კოლონას აგინა.

ვრცლად ამ თემაზე: "ფორთოხლის გამყიდველი" ვიტალი გუგუჩია ბრალის წარსადგენად დაიბარეს