ამერიკის შეერთებული შტატების ვიცე-პრეზიდენტი მაიკ პენსი მრავალეროვნული სწავლების - "ღირსეული პარტნიორი" მონაწილე სამხედროებს შეხვდა.

მრავალეროვნულ სწავლებას - „ღირსეული პარტნიორი" საქართველო უკვე მესამედ მასპინძლობს. ამჯერად სწავლება გაცილებით ფართომასშტაბიანია და მასში ნატოს წევრი და პარტნიორი 8 ქვეყანა მონაწილეობს.

„აქ ვდგავართ იმისთვის, რომ ხაზი გავუსვათ ურყევ პარტნიორობას და ვუთხრათ ქართველ მეგობრებს, რომ ჩვენ თქვენს გვერდით ვართ! ჩვენ თქვენს გვერდზე ვდგავართ იმიტომ, რომ ქართული ანდაზა ამბობს - „ძალა ერთობაშია“. შესაბამისად, ჩვენ ერთად უფრო ძლიერები ვიქნებით“.

ფოტო: თავდაცვის სამინისტრო

პენსის თქმით, ის საქართველოში დონალდ ტრამპის დავალებით იმყოფება:

„აქ ვიმყოფები, რათა მადლობა გადაგიხადოთ იმ სამსახურისთვის, რომელსაც თქვენ სამშობლოს თავისუფლების დასაცავად უწევთ. თქვენ საუკეთესონი ხართ! აშშ და საქართველო საერთო ღირებულებებს იზიარებენ, რაც თავისუფლებისკენ სწრაფვას გულისხმობს“ - ამ სიტყვებით მიმართა აშშ-ის ვიცე-პრეზიდენტმა მაიკ პენსმა მრავალეროვნულ სწავლებაში „ღირსეული პარტნიორი 2017“ მონაწილე ქართველ და ამერიკელ სამხედრო მოსამსახურეებს ალექსეევკას შერეულ საავიაციო ბაზაზე.

აშშ-ის ვიცე-პრეზიდენტმა აღნიშნა, რომ სტრატეგიული პარტნიორობა ამერიკასა და საქართველოს შორის უფრო ძლიერია, ვიდრე ოდესმე ყოფილა

მაიკ პენსმა ავღანეთში დაღუპული ქართველი მშვიდობისმყოფელებიც გაიხსენა და ხაზი გაუსვა, რომ თავისუფლებისთვის ბრძოლაში დაღუპული ქართველი ჯარისკაცები ამერიკელ ხალხს მუდამ ემახსოვრება.

აშშ-ის ვიცე-პრეზიდენტმა კიდევ ერთხელ გააჟღერა შეერთებული შტატების ურყევი მხარდაჭერა საქართველოს სუვერენიტეტისა და ტერიტორიული მთლიანობის მიმართ და განაცხადა, რომ პრეზიდენტ ტრამპის ადმინისტრაციის პირობებში არცერთ ქვეყანას არ მიეცემა უფლება კითხვის ნიშნის ქვეშ დააყენოს საქართველოს საერთაშორისოდ აღიარებული საზღვრები.

„ღირსეული პარტნიორი 2017“-ში მონაწილე ქართულ და ამერიკულ სამხედრო ქვედანაყოფებს საქართველოს პრეზიდენტი გიორგი მარგველაშვილი და თავდაცვის მინისტრი ლევან იზორია მიესალმნენ.

„ჩვენი ქვეყნების შეიარაღებული ძალები გვერდი-გვერდ იმყოფებიან ქართულ მიწაზე ჩვენი ღირსების, უსაფრთხოების და თავისუფლების დასაცავად. ამიტომაც ბრძანდებით ღირსეულები და თქვენი პარტნიორობა ჩვენი საერთო კეთილდღეობისათვის უმნიშვნელოვანესია“, - განაცხადა გიორგი მარგველაშვილმა.

სწავლების მონაწილე სამხედროებთან შეხვედრას ესწრებოდნენ საქართველოს პრეზიდენტი გიორგი მარგველაშვილი, ასევე პრემიერმინისტრი გიორგი კვირიკაშვილი მეუღლესთან ერთად, საგარეო საქმეთა მინისტრი მიხეილ ჯანელიძე, ეროვნული უშიშროების საბჭოს მდივანი დავით რაქვიაშვილი, საქართველოს პრეზიდენტის ადმინისტრაციის უფროსი გიორგი აბაშიშვილი, საგარეო ურთიერთობათა მდივანი თენგიზ ფხალაძე, ამერიკის ელჩი საქართველოში იან კელი და საქართველოს ელჩი ამერიკაში დავით ბაქრაძე.

„ღირსეული პარტნიორი 2017“-ში მონაწილე სამხედროებთან შეხვედრით მაიკ პენსმა საქართველოში ოფიციალური ვიზიტი დაასრულა.