საქართველოს ახალგაზრდა იურისტთა ასოციაციის (საია) ცნობით, 25 ივლისს, თბილისის საქალაქო სასამართლომ, საქართველოს ეროვნული მუზეუმის ყოფილი თანამშრომლის სარჩელი დააკმაყოფილა.

შედეგად, სასამართლომ, ეროვნული მუზეუმის მიერ მოსარჩელესთან შრომით ურთიერთობის შეწყვეტის თაობაზე მიღებული გადაწყვეტილება (გათავისუფლების ბრძანება) ბათილად ცნო.

მოპასუხეს დაეკისრა მოსარჩელისთვის იძულებითი განაცდურისა და კომპენსაციის სახით 5 000 ლარის ანაზღაურება.

"საქმეში გამოიკვეთა რეორგანიზაციის ფარგლებში კომპეტენციის არასათანადოდ შემოწმების პრობლემა, შეფასების კრიტერიუმების არარსებობა და დასაქმებულისთვის ტოლფასი ვაკანტური თანამდებობის შეთავაზებაზე უარი, რაც სრულად ეწინააღმდეგება მოქმედ შრომის კანონმდებლობას", — წერს საია.

მათივე თქმით, ეროვნულმა მუზეუმმა დასაქმებულთან შრომითი ურთიერთობა 2022 წლის 1-ელი ივნისიდან შეწყვიტა. ხელშეკრულების შეწყვეტამდე განხორციელდა რეორგანიზაციის ფარგლებში შექმნილ კომისიასთან გასაუბრება, თუმცა, საიას შეფასებით, კომისიას კანდიდატის კომპეტენციის შემოწმების მცდელობაც კი არ ჰქონია. საბოლოოდ კი, განთავისუფლების მიზეზად თანამშრომლის კომპეტენციის არადამაკმაყოფილებელი დონე დასახელდა.