"ეს არის სისტემის რეაქცია, სისტემა ძალიან სწრაფად რეაგირებს თავის დასაცავად", — ასე შეაფასა კახა წიქარიშვილმა საქალაქო სასამართლოს გადაწყვეტილება, რომლის მიხედვით, პრეზიდენტის განკარგულება, იუსტიციის უმაღლესი საბჭოს წევრად წიქარიშვილის დანიშვნის შესახებ, შეჩერებულია.

წიქარიშვილის თქმით, "სასამართლოში არსებული კლანის მხრიდან" საწინააღმდეგო ღონისძიებას მოელოდა, თუმცა, არ იცოდა, კონკრეტულად როგორი და რა მეთოდი იქნებოდა გამოყენებული.

"ვფიქრობ, რომ ეს გარკვეულწილად არის სისტემის რეაქცია ჩემს დანიშვნასთან დაკავშირებით, იმიტომ, რომ ერთ დღეში, განცხადების შეტანიდან რამდენიმე საათში განკარგულების შეჩერება, იმ დროს, როდესაც სასამართლოში საქმეები თვეები და წლები ჭიანურდება და ვერ იცლიან ხანდახან თვეების განმავლობაში, გადახედონ საქმეებს, ეს თავისთავად მეტყველებს, რომ სისტემა ძალიან სწრაფად რეაგირებს თავის დასაცავად", — თქვა წიქარიშვილმა ტელეკომპანია პირველის ეთერში.

წიქარიშვილის განმარტებით, მოსარჩელე თვლის, რომ კონკურსის დროს მიუკერძოებლობის პრინციპი დაირღვა.

"როგორც გადმომცეს სარჩელის საფუძველი არის ის, რომ კონკურსის დროს დარღვეულ იქნა მიუკერძოებლობის პრინციპი. ანუ კომისიის წევრი ბესო ლოლაძე, რომელიც არის დამოუკიდებელი იურისტების ჯგუფის წევრი, მან არ აიცილა კომისიაში მონაწილეობა.

ასევე, ნონა ქურდოვანიძეზე არის ყურადღება გამახვილებული, რომ მე წარმადგინა საია-მ 2013 წელს და შესაბამისად, ნონა ქურდოვანიძესაც ეს უნდა აეცილებინა და მესამე საფუძველი, როგორც ვიცი არის ის, რომ კომისიამ არ დამისვა შეკითხვები ჩემს კვალიფიკაციასთან დაკავშირებით, განსხვავებით სხვა კანდიდატებისგან", — განაცხადა წიქარიშვილმა.

გუშინ, 22 ივლისს, თბილისის საქალაქო სასამართლომ განაცხადა, რომ პრეზიდენტის განკარგულება, იუსტიციის უმაღლესი საბჭოს წევრად კახა წიქარიშვილის დანიშვნის შესახებ, შეჩერებულია.

მიზეზი პრეზიდენტის მიმართ საქალაქო სასამართლოს ადმინისტრაციულ საქმეთა კოლეგიაში შესული სარჩელია, რომლის ავტორი, მედიაში გავრცელებული ინფორმაციით, ადვოკატი მანუჩარ კაკოჩაშვილია.

გაიგე მეტი: "ეს სასამართლოს კლანური მმართველობის კიდევ ერთი დასტურია" — მსხილაძე იუსტიციის საბჭოს წევრად წიქარიშვილის დანიშვნის განკარგულების შეჩერებაზე