კავკასიის კვლევითი რესურსების ცენტრმა (CRRC საქართველო) გამოაქვეყნა კვლევა — კავკასიის ბარომეტრი 2024, რომლის მიხედვით, გამოკითხულთა 69% ქვეყნის მთავარ მტრად რუსეთს მიიჩნევს.

გამოკითხულთა 4% საქართველოს მთავარ მტრად ამერიკის შეერთებულ შტატებს ასახელებს, 2% თურქეთს, ხოლო 1% სომხეთს.

ფოტო: კავკასიის კვლევითი რესურსების ცენტრი

კვლევის მიხედვით, გამოკითხულთა 24% საქართველოს მთავარ მეგობრად ამერიკის შეერთებული შტატებს მიიჩნევს, 8% — აზერბაიჯანს, 7% — უკრაინას, 4-4% კი თურქეთსა და გერმანიას.

  • გამოკითხულთა 26% ფიქრობს, რომ საქართველოს მეგობარი არც ერთი ქვეყანა არაა.

ფოტო: კავკასიის კვლევითი რესურსების ცენტრი

კავკასიის ბარომეტრი ყოველწლიური გამოკითხვაა, რომლის მიზანია სანდო და ერთმანეთთან შესადარი მონაცემების შეგროვება ოჯახების ეკონომიკურ ქცევასა და სოციალურ შეხედულებებზე სამხრეთ კავკასიის ქვეყნებში.

გამოკითხვა 2004 წლიდან ტარდება საქართველოში, სომხეთსა და აზერბაიჯანში.

2024 წლის კავკასიის ბარომეტრის ფარგლებში, 1 509 რესპონდენტი გამოიკითხა. საველე სამუშაოები მიმდინარეობდა 2024 წლის 16 აპრილიდან 13 მაისამდე.

  • კვლევის ფარგლებში, გამოიკითხა საქართველოს ზრდასრული მოსახლეობა (18 წელი და ზემოთ).
  • ოკუპირებულ ტერიტორიებზე მცხოვრებ მოსახლეობას კვლევაში მონაწილეობა არ მიუღია.