შინაგან საქმეთა სამინისტროს ინფორმაციით, დამამძიმებელ გარემოებაში ჩადენილი განზრახ მკვლელობისა და ცეცხლსასროლი იარაღის უკანონო შეძენა-შენახვა-ტარების ბრალდებით, 29 წლის, წარსულში ნასამართლევი და ამჟამად პირობითი მსჯავრის ქვეშ მყოფი პირი დააკავეს.

დანაშაული 20 წლამდე ან უვადო პატიმრობას ითვალისწინებს.

გამოძიებით დადგინდა, რომ დაკავებულს 32 წლის სიძესთან კონფლიქტი მოუვიდა. ის სიძის სახლთან საჩხერეში მივიდა და იქვე არსებულ ავტოფარეხთან, სადაც სიძის მეგობარიც იმყოფებოდა, ცეცხლსასროლი იარაღიდან რამდენჯერმე ისროლა.

სიძის მეგობარი სამედიცინო დაწესებულებაში მოათავსეს, თუმცა, მისი გადარჩენა ვერ მოხერხდა.

სამართალდამცველებმა პირი ბრალდებულის სახით, ცხელ კვალზე დააკავეს.