საქართველოს მთავრობის განკარგულებით, კახეთის რეგიონში 2017 წლის რთველზე, ღვინის გადამუშავების ნაწილში, სუბსიდია აღარ გაიცემა. ამის შესახებ დღეს, 27 ივნისს, სოფლის მეურნეობის მინისტრმა ლევან დავითაშვილმა მთავრობის სხდომის დასრულების შემდეგ განაცხადა.

მინისტრის მტკიცებით, სუბსიდიის გაუქმების მიზეზი ისაა, რომ ბოლო წლების ღვინის ექსპორტის ტენდენცია მზარდია და მეღვინეობის დარგის მიმართულებით კონიუქტურა ძალიან გაჯანსაღებულია. მისივე თქმით, არის მოლოდინი, რომ კერძო სექტორის მხრიდან იქნება დიდი დაინტერესება და მოთხოვნა ყურძნის შესყიდვაზე.

ამასთან, სახელმწიფო აგრძელებს ბრენდის წარმოების სუბსიდიას. მთავრობის გადაწყვეტილებით, ღვინის კომპანიები, რომლებიც საბრენდე სპირტისა და კონცენტრირებული ყურძნის ტკბილის წარმოების მიზნით რქაწითელსა და კახური მწვანის ჯიშის 1 კგ ყურძენს არანაკლებ 70 თეთრად შეისყიდიან, სახელმწიფოსგან დამატებით 35 თეთრს მიიღებენ. ასევე, ღვინისა და ალკოჰოლიანი სასმელების მწარმოებელი კომპანიებისათვის, შეღავათიანი აგროკრედიტის პროექტის ფარგლებში, გაგრძელდება სესხების გაცემა საბრუნავი საშუალებების მიზნობრიობით.

ლევან დავითაშვილის თქმით, 2017 წლის რთველის ორგანიზებასთან დაკავშირებით შეიქმნება საკოორდინაციო შტაბი, რომელიც დაკომპლექტდება ღვინის ეროვნული სააგენტოს, სოფლის მეურნეობის, ეკონომიკისა და მდგრადი განვითარებისა და შინაგან საქმეთა სამინისტროების, სოფლის მეურნეობის პროექტების მართვის სააგენტოს და სახელმწიფო რწმუნებულების - გუბერნატორების წარმომადგენლებით.

სუბსიდია შენარჩუნდება რაჭა-ლეჩხუმის რეგიონში ხვანჭკარის ჯიშებზე. მთავრობის განკარგულებით, 2019 წლიდან რაჭა-ლეჩხუმის რეგიონიდან სახვანჭკარე ჯიშების სხვა რეგიონში გადამუშვების მიზნით გატანა შეიზღუდება.