რა ხდება: თბილისში, პარლამენტის შენობის წინ მიმდინარეობს მასშტაბური საპროტესტო აქცია.

ხალხი აპროტესტებს ქართული ოცნების საპარლამენტო უმრავლესობის მიერ, რუსული კანონის პირველი მოსმენით მიღებას.

  • აქციის მონაწილეები მოითხოვენ, ქართული ოცნების ლიდერებმა დღესვე გაიწვიონ უკან რუსული კანონი.

გუშინდელი დღისგან განსხვავებით, დღეს, 17 აპრილს, უშუალოდ პარლამენტის შენობის ირგვლივ, ერთეული სამართალდამცავების გარდა, საპოლიციო ძალები არ შეიმჩნევიან.

22:00 საათის მონაცემებით,

  • ისინი არ არიან მობილიზებული შენობის გვერდითა — 9 აპრილისა და ჭიჭინაძის ქუჩებზე.
  • საპოლიციო ძალები არც პარლამენტის შენობის უკანა მხარეს დგანან და არც ქაშვეთის ეკლესიის უკან მდებარე პარკში, სადაც, გუშინ, ჯერ კიდევ დღისით იყვნენ განთავსებული.

ასობით პოლიციელია მობილიზებული მთავრობის ადმინისტრაციის შენობის უკან

საპოლიციო ძალები არიან თავისუფლების მოედანზე: იქ არის მობილიზებული ავტობუსები, რომელშიც სავარაუდოდ, სპეცრაზმი იმყოფება.

თავისუფლების მოედანზე გადაღებულ ფოტოში ასევე ჩანს წყლის ჭავლის მანქანა და მიტინგის დასაშლელად განკუთვნილი სხვა სპეციალური ტექნიკა.

გარდა ამისა, On.ge-მ გადაიღო პარლამენტის შენობის მიმდებარე ტერიტორიაზე არსებული კიდევ ერთი სახელმწიფო ადმინისტრაციული შენობის ეზო, რომელშიც ასევე განლაგებულია საპოლიციო ძალები.

არსებული ინფორმაციით, სპეცრაზმი იმყოფება უშუალოდ პარლამენტის შენობის ეზოშიც.

ბოლო ხაზი: On.ge-მ, 18:30 საათისთვის გადაიღო კადრები, რომელშიც ჩანს, როგორ შემოდის თბილისში საპოლიციო ძალების კოლონა.