რა ხდება: პუტინის ყველაზე დიდი პოლიტიკური მეტოქე, ალექსეი ნავალნი ციხიდან გაუჩინარდა.

დეტალები: ნავალნის თანამებრძოლები ამბობენ, რომ დაპატიმრებულ პოლიტიკოსს რამდენიმე დღეა, ვეღარ უკავშირდებიან.

ისინი ამბობენ, რომ მოსკოვიდან 200 კმ-ში მდებარე ციხეში, მელეხოვოში, სადაც ის იყო მოთავსებული, თავდაპირველად, ნავალნის გაუჩინარებას ელექტროენერგიის პრობლემებს მიაწერდნენ.

ორშაბათს ნავალნის ადვოკატს ციხის თანამშრომლებმა განუცხადეს, რომ ოპოზიციონერი პოლიტიკოსი იქ აღარ იმყოფებოდა.

///

რა შეიძლება ყოფილიყო გაუჩინარების მიზეზი: ნავალნის მომხრეებისთვის მოვლენების ასეთი განვითარება მოულოდნელი არ აღმოჩნდა, განსაკუთრებით, მას მერე, რაც მოსამართლემ აგვისტოში, ექსტრემიზმის ბრალდებით, პოლიტიკოსს დამატებითი 19 წელი მიუსაჯა "სპეციალური რეჟიმის" ციხეში.

  • ისინი ფიქრობენ, რომ ნავალნის გაუჩინარება საპრეზიდენტო არჩევნებს უკავშირდება — მარტში პუტინი, პრეზიდენტის პოსტზე, მეხუთედ იყრის კენჭს.
  • "პუტინმა იცის, ვინ არის მისი მთავარი ოპონენტი ამ "არჩევნებზე". ის დარწმუნებული უნდა იყოს, რომ ნავალნის ხმას ვერავინ გაიგებს", — დაწერა ნავალნის თანამებრძოლმა, ლეონიდ ვოლკოვმა "ტელეგრამზე".

ევროკავშირის უმაღლესმა წარმომადგენელმა, ჯოზეფ ბორელმა კი განაცხადა, რომ ნავალნის გაუჩინარება შემაშფოთებელია.

  • "რუსეთის პოლიტიკური ხელმძღვანელობა არის მის უსაფრთხოებასა და ჯანმრთელობაზე პასუხისმგებელი ციხეში", — დაწერა ბორელმა X-ზე.

ნავალნისთან დაკავშრებული კითხვის პასუხად, პუტინის პრესსპიკერმა, დმიტრი პესკოვმა თქვა, რომ კრემლს არც სურვილი ჰქონდა და არც შესაძლებლობა იმის, რომ პატიმრის ადგილმდებარეობა დაადგინოს.

ბოლო ხაზი: მიუხედავად იმისა, რომ ნავალნი ციხეში სრულად იზოლირებული, მკაცრი მეთვალყურეობის ქვეშ იყო, მან მოახერხა თავისი გზავნილის გავრცელება სოციალურ მედიაში პოსტებით. გასულ კვირას მან მოუწოდა რუსებს, დაეწყოთ პუტინის წინააღმდეგ საინფორმაციო კამპანია.