Spider-Verse-ის მეორე ნაწილი, რომელიც სულ ცოტა ხნის წინ გამოვიდა, უკვე პოპულარობის პიკშია. Spider-Man: Across the Spider-Verse-მა გამოსვლიდან სულ რაღაც ერთ კვირაში 120 მილიონ დოლარზე მეტი გამოიმუშავა, რაც იმას ნიშნავს, რომ სპაიდერმენის ფანებს ანიმაციის მეორე ნაწილი ძალიან მოეწონათ.

გარდა იმისა, რომ ანიმაციამ მაყურებელი მულტისამყაროს მაქინაციებითა და გასაოცარი ვიზუალი კიდევ ერთხელ განაცვიფრა, ფანები კიდევ ერთი დეტალით არიან აღფრთოვანებულები. კერძოდ, Spider-Verse-ის ფანები ფიქრობენ, რომ ანიმაციის პერსონაჟი გვენ სტეისი ტრანსგენდერი ქალია.

ანიმაციის ფანების აზრით, ფილმში რამდენიმე მინიშნებას ვხედავთ, რომელიც გვენ სტეისის გენდერულ იდენტობაზე მიუთითებს. ანიმაციის ერთ-ერთ სცენაში გვენ სტეისის ოთახში ტრანსგენდერი ადამიანების დროშას ვხედავთ და ვკითხულობ წარწერას "დაიცავი ტრანსგენდერი ბავშვები". გარდა ამისა, კიდევ ერთ სცენაში გვენის მამის პოლიციის ფორმაზე მიმაგრებულ ტრანსგენდერი ადამიანების პატარა დროშასაც ვხედავთ. კიდევ ერთი დეტალი, რომელსაც ფანების ყურადღებას აქცევენ, ისაა, რომ გვენ სტეისი ანიმაციაში ხშირად ვარდისფერი და ლურჯი ფერებითაა გარშემორტყმული.

ფოტო: Sony Pictures

მიუხედავად იმისა, რომ ანიმაციის შემქმნელებს გვენ სტეისის გენდერული იდენტობის შესახებ არასდროს არაფერი უთქვამთ და ამაზე არც ფილმშია საუბარი, ინტერნეტის ყურადღება ამ მინიშნებებმა მაინც მიიპყრო.

"ტრანსგენდერ მაყურებლებს სრული უფლება აქვთ ჩათვალონ, რომ სტეისი ტრანსგენდერი პერსონაჟია, მაშინაც კი, როცა ფილმები ამას არ ადასტურებენ. ვერავინ უარყოფს, რომ ფილმებში ამაზე არ მიგვანიშნებენ", — წერს ტვიტერის ერთ-ერთი მომხმარებელი.

მართალია, ყველა არ ეთანხმება იმ მოსაზრებას, რომ გვენ სტეისი ანიმაციაში ტრანსგენდერი შეიძლება იყოს, თუმცა თავად იმ ფაქტს უჭერენ მხარს, რომ ამ საკითხზე ლაპარაკი დაიწყო. "არ მგონია, რომ პერსონაჟი ტრანსგენდერია თუ არა ისეთივე მნიშვნელოვანი იყოს, როგორც საბავშვო ფილმი, რომელიც ტრანსგენდერ ბავშვებსა და ზრდასრულ მაყურებელს ეუბნება, რომ ამ ბრძოლაში ისინი მარტო არ არიან და მათ მხარს უჭერენ", — ამბობს მწერალი და არაერთი კომიქსის ავტორი, ზოი ტუნელი.

სავარაუდოდ, გვენ სტეისის გენდერული იდენტობის შესახებ დებატები კიდევ გაგრძელდება, რადგან Spider-Verse-ის შემქმნელები ანიმაციის მესამე ნაწილის გადაღებასაც გეგმავენ, რომელსაც მომავალ წელს ვიხილავთ.