საქართველოს საპარლამენტო უმრავლესობის წევრი და ადამიანის უფლებათა დაცვის კომიტეტის თავმჯდომარე, სოფო კილაძე ამბობს, რომ საქართველოდან გაუჩინარებული აფგან მუხტარლის საქმის გამოძიებას დრო სჭირდება. ამის შესახებ კილაძემ ტელეკომპანია რუსთავი 2-თან საუბრისას განაცხადა.

"დაიწყო გამოძიება და შესაბამისად, ჩატარდა ძალიან ბევრი საგამოძიებო მოქმედება და ვფიქრობ, რომ გარკვეული დროის შემდეგ ამ საქმეზე ჭეშმარიტებას მოეფინება ნათელი. ნუ ვიჩქარებთ წინასწარი დაკვნების გამოტანას, რა თქმა უნდა, არის გარკვეული კითხვის ნიშნები, მაგრამ ჩვენი პასუხისმგებლობა ის არის, რომ შესაბამისად ადეკვატურად გავცეთ ამ კითხვის ნიშნებს პასუხი", - აღნიშნა კილაძემ.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.