BBC-ის ცნობით, ჩრდილო-დასავლეთ ყაზახეთში, ქალაქ აქტობაში, სავარაუდოდ, ისლამისტური დაჯგუფების თავდასხმის შედეგად, 6 ადამიანი დაიღუპა, 9 კი დაშავებულია. შეიარაღებულმა პირებმა ჯერ იარაღის ორი მაღაზია გაძარცვეს, შემდეგ კი ქალაქში მდებარე სამხედრო ბაზას დაესხნენ თავს.

პოლიციის მხრიდან სროლის შედეგად, 4 თავდამსხმელია მოკლული, დანარჩენებმა კი გაქცევა მოახერხეს.

სოციალურ ქსელში გავრცელებულ ვიდეოში ჩანს რომ შეიარაღებული მამაკაცები ქალაქის ქუჩებში მოძრაობენ და სროლისთვის ემზადებიან.

ხელისუფლება მოსახლეობას სახლებში დარჩენას ურჩევს. შინაგან საქმეთა მინისტრის, ალმას სადუბაევის თქმით, თავდამსხმელები რადიკალური რელიგიური დაჯგუფებების წევრები იყვნენ.

ქალაქში აღარ მოძრაობს საზოგადოებრივი ტრანსპორტი, სრულად დაიკეტა სავაჭრო და გასართობი ცენტრები.