განცხადებაში, რომელიც საქართველოს უნივერსიტეტმა (UG-მ) გამოაქვეყნა, ნათქვამია, რომ პრემიერის ბრალდებებით შეშფოთებულები არიან.

რატომ არის მნიშვნელოვანი: 12 მარტს, იმედის ეთერში ირაკლი ღარიბაშვილმა თქვა, რომ ფრანკლინის კლუბში, რომელიც საქართველოს უნივერსიტეტშია შექმნილი, ახალგაზრდებს "წამლავენ" და "ტვინს ურეცხავენ".

  • სწორედ ეს ახალგაზრდები დაადანაშაულა პრემიერმა რუსული კანონის საწინააღმდეგო აქციაზე ძალადობასა და პროვოკაციულ ქმედებებში.
  • ღარიბაშვილმა მათ ანარქისტები უწოდა და თქვა, რომ სატანისტების ფორმები ეცვათ.
  • მისივე ინფორმაციით, პრეზიდენტობის დროს სააკაშვილმა უნივერსიტეტი გიული ალასანიას ერთ ლარად გადასცა.

დეტალები: UG-ში ამბობენ, რომ ღარიბაშვილის განცხადებები უნივერსიტეტის პრესტიჟს ლახავს და სინამდვილეს არ შეესაბამება.

  • "გიული ალასანიამ და მანანა სანაძემ უნივერსიტეტი დააარსეს და მათთვის ის არავის "გადაუცია". რაც შეეხება შენობა-ნაგებობებს, ყველაფერი შეძენილია ღია აუქციონზე და გადახდილია 4 მილიონ აშშ დოლარამდე. ეს თანხა უნივერსიტეტმა საბანკო კრედიტის საშუალებით დაფარა. ცხადია, ამის დამადასტურებელი ყველა საბუთი საჯაროდაა ხელმისაწვდომი", — ვკითხულობთ განცხადებაში.
  • მათივე თქმით, ცრუ კამპანიაზე სამართლებრივ პროცედურას დაიწყებენ და მზად არიან ნებისმიერ სატელევიზიო ეთერში, მათ შორის, ღარიბაშვილთან სასაუბროდ.
  • "საქართველოს უნივერსიტეტი ამაყობს იმით, რომ ზრდის თავისუფლად მოაზროვნე თაობას, რომელიც თავად წყვეტს, რომელ აქციაზე დადგეს, რა მოითხოვოს და როგორ დაიცვას საკუთარი უფლებები, იქნება ეს უნივერსიტეტის კედლებს შიგნით თუ მის გარეთ. ქვეყნის უახლეს ისტორიაში ქართველმა სტუდენტებმა არაერთხელ ითამაშეს გადამწყვეტი როლი და მიგვაჩნია, რომ ამ როლის დაკნინება სტუდენტებისთვის სილის გაწვნის ტოლფასია", — ნათქვამია განცხადებაში.