შინაგან საქმეთა სამინისტროს ინფორმაციით, გენერალური ინსპექციის მიერ ჩატარებული სამსახურებრივი შემოწმების შემდეგ, ტყიბულისა და ზესტაფონის რაიონული სამმართველოს უფროსები - ზაზა ჩუბინიძე და პავლე ბუბულაშვილი სამსახურიდან დაითხოვეს. მიზეზი მათ შორის 7 მაისს, ონში მომხდარი დაპირისპირებაა. სანქციები გატარდა სხვა პოლიციელების მიმართაც. შსს-ს იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის დირექტორის მოადგილეს შეეფარდა დისციპლინური სახდელი - თანამდებობიდან ჩამოქვეითება, ხოლო შს სამინისტროს იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის დირექტორს გამოეცხადა შენიშვნა და ჩამოქვეითდა თანამდებობიდან.

შინაგან საქმეთა სამინისტროს ცნობით, პოლიციელებს შორის დაპირისპირება არ უკავშირდება პოლიციის დღის აღნიშვნას:

"ამასთან, ხაზგასმით აღვნიშნავთ, რომ კონფლიქტის დროს პოლიციის აწ უკვე ყოფილ თანამშრომლებს შორის მოხდა მხოლოდ სიტყვიერი და არა ფიზიკური დაპირისპირება, მით უფრო, ნივთის (როგორც მედიასაშუალებით გაჟღერდა - ხელკეტის) გამოყენებას ადგილი არ ჰქონია. ამას ადასტურებს შსს-ს გენერალური ინსპექციის მიერ სამსახურებრივი შემოწმების დროს დაკითხულ პირთა აბსოლუტური უმრავლესობა, მათ შორის, თვითმხილველები და მოწმეები. გამოკითხულია ასევე ჟურნალისტი იმერეთის რეგიონიდან, რომელმაც პირველად გაავრცელა აღნიშნული ინფორმაცია. ფაქტის (ხელკეტების გამოყენება) სარწმუნოობას ვერც იგი ადასტურებს".

შინაგან საქმეთა სამინისტრო მოუწოდებს მედიის წარმომადგენლებს, უწყებაში გადაამოწმონ მათთვის საინტერესო ყველა ინფორმაცია, რათა არ მოხდეს საზოგადოების შეცდომაში შეყვანა.