ამის შესახებ ლევან იოსელიანმა ჟურნალისტებთან ისაუბრა.

რატომ არის მნიშვნელოვანი: გუშინ, 7 მარტს, პარლამენტმა დაუგეგმავად განიხილა და პირველი მოსმენით მხარი დაუჭირა რუსულ კანონპროექტს — გასაპროტესტებლად მოქალაქეებმა პარლამენტთან დაიწყეს შეკრება.

  • ხელისუფლებამ აქციის მონაწილეთა წინააღმდეგ რამდენიმე სპეციალური საშუალება გამოიყენა, მათ შორის, ცრემლსადენი გაზი, წიწაკის სპრეი, წყლის ჭავლი.
  • შსს-ს განცხადებით, დაკავებულია 66 მოქალაქე — ორგანიზაციებისთვის კი ამ დროისთვის მხოლოდ 42 პირის ვინაობაა ცნობილი.
  • NGO-ების შეფასებით, მშვიდობიანი სამოქალაქო პროტესტის წინააღმდეგ პოლიციამ უკანონო და არაპროპორციული ძალა გამოიყენა.

დეტალები: სახალხო დამცველის თქმით, ის ყველა დაკავებულს ესაუბრა. ამბობს, რომ მოქალაქეები მოულოდნელად დააკავეს, მათ შორის, გამვლელებიც.

  • იოსელიანის თქმით, დაზიანებების თვალსაზრისით, ყველაზე რთული შემთხვევა, ზურა ჯაფარიძეს აქვს და სხვებს ასე რთულად, ვიზუალურად არ ეტყობათ.
  • მისივე თქმით, ყველა დაზიანებებზე ექიმები შესაბამის დასკვნას მოამზადებენ.
  • იოსელიანი ამბობს, რომ ზურა ჯაფარიძემ ხელკეტებით ცემა დაუდასტურა, დაკავების დეტალები მოუყვა და ჩვენება მისცა — გამოძიება დაწყებულია.
  • გადაამეტა თუ არა სამართალდამცავებმა ძალას, ამბობს, რომ ამის შესახებ სახალხო დამცველს დეტალური განცხადება ექნება.
  • თუმცა ამატებს, რომ ცალკეულ შემთხვევებში ჩანდა, რომ ძალის გამოყენების პროპორცია გადამეტებული იყო.