პოლონეთის პრეზიდენტის, ანდჟეი დუდას განცხადებით, არ არსებობს მინიშნება, რომ ქვეყნის აღმოსავლეთით ჩამოვარდნილი რაკეტები "განზრახ თავდასხმა" იყო.

რატომ არის მნიშვნელოვანი: პოლონეთის საგარეო საქმეთა სამინისტრომ გუშინ, 15 ნოემბერს განაცხადა, რომ რუსული წარმოების რაკეტა პოლონურ სოფელ პრჟევოდოვზე, უკრაინის საზღვართან ჩამოვარდა, რის შედეგადაც ორი ადამიანი დაიღუპა.

  • დუდას განცხადებით, ეს იყო რუსული წარმოების S-300 რაკეტა, თუმცა არ აქვთ მტკიცებულება, რომ ის რუსულმა მხარემ გაისროლა.

დეტალები: დუდას თქმით, არსებობს "ბევრი მინიშნება", რომ ეს იყო საჰაერო თავდაცვის რაკეტა, რომელიც "სამწუხაროდ დაეცა პოლონეთის ტერიტორიაზე".

  • პრეზიდენტის სასახლეში მინისტრებისა და სამხედრო მეთაურების ეროვნული უშიშროების საბჭოს სხდომა მიმდინარეობს.
  • დუდას თქმით, ნატოს ძალები და ჩვენი ქვედანაყოფები მზადყოფნაშია მოყვანილი.

მანამ, სანამ პოლონეთში რაკეტა ჩამოვარდებოდა, ოკუპანტებმა ერთდროულად უკრაინის რამდენიმე ქალაქსა და რეგიონზე მიიტანეს იერიში. შესაბამისად, უკრაინა საჰაერო თავდაცვისთვის იყენებდა რაკეტებს.

  • უკრაინის საჰაერო სარდლობის ცნობით, რუსეთმა უკრაინის მიმართულებით 100 რაკეტა გაისროლა.
  • დაზიანებულია საცხოვრებელი სახლები და ენერგეტიკული ინფრასტრუქტურა.

NATO და G7: საგანგებო შეხვედრის შემდეგ ერთობლივი განცხადება გაავრცელეს და სრული მხარდაჭერა გამოუცხადეს პოლონეთს.

  • "ჩვენ გთავაზობთ სრულ მხარდაჭერას და დახმარებას პოლონეთის მიმდინარე გამოძიებაში. ჩვენ ვთანხმდებით, რომ დავრჩეთ მჭიდრო კავშირში, რათა განვსაზღვროთ შესაბამისი შემდგომი ნაბიჯები გამოძიების მიმდინარეობისას", — ვკითხულობთ განცხადებაში.
  • "ჩვენ ვადასტურებთ ჩვენს ურყევ მხარდაჭერას უკრაინისა და უკრაინელი ხალხის მიმართ მიმდინარე რუსული აგრესიის ფონზე".