სტრასბურგის ადამიანის უფლებათა ევროპულმა სასამართლომ მამალაძის საქმეზე რამდენიმე კონვენციური მუხლის დარღვევა დაადგინა. დაკისრებული თანხა მთავრობამ მამალაძეს სამი თვის განმავლობაში უნდა გადაუხადოს.

რატომ არის მნიშვნელოვანი: გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა.

  • მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.
  • დეკანოზი გიორგი მამალაძე სასამართლომ დამნაშავედ ცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.
  • 2018 წლის 13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად ცნო.

დეტალები: სასამართლომ დაადგინა, რომ მამალაძის საქმეში კონვენციის მე-6 მუხლის პირველი პუნქტი — მტკიცებულებების მოპოვების და გამოყენების ნაწილი, არ დარღვეულა.

  • თუმცა, ადგილი ჰქონდა კონვენციის მე-6 მუხლის პირველი პუნქტის დარღვევას სისხლის სამართლის პროცესის დახურულ რეჟიმში ჩატარების გამო.
  • ასევე, დარღვეული იყო კონვენციის მე-6 მუხლის მე-2 პუნქტი (უდანაშაულობის პრეზუმფცია)
  • ეს ყველაფერი კი საკმარისია, რათა განმცხადებელს ნებისმიერი სახის მორალური ზიანი აუნაზღაურდეს.

მამალაძე, ასევე, ითხოვდა, მატერიალური ზიანის ასანაზღაურებლად 376 304 ლარს და მორალური ზიანისთვის 150 000 ევროს, რაც სასამართლომ არ დააკმაყოფილა.

  • ხოლო მოთხოვნა 6360 ლარზე სასამართლოში მისი იურიდიული წარმომადგენლობისთვის და 3058 ლარზე დოკუმენტების თარგმნის, საფოსტო და სხვა ხარჯებისთვის, დაკმაყოფილდა.

ადვოკატის განცხადებით, სტრასბურგმა სამიდან ორი საკითხი დააკმაყოფილა და პალატამ ერთხმად დაადგინა, რომ დეკანოზ გიორგი მამალაძეს საქმის სამართლიანი განხილვის უფლება დაირღვა.

  • "ეს წლები საქმის ინტერესებიდან გამომდინარე არ ვაკეთებდი კომენტარებს, ამას მოითხოვდა საქმის ინტერესები. დიდი გამარჯვებაა! მადლობა ყველას", — წერს დავით ჯანდიერი.

გადაწყვეტილებას გამოეხმაურა მამალაძის ძმა. მისი თქმით, ამ ეტაპზე, მნიშვნელოვანია, რომ სახელმწიფომ ქმედითი ნაბიჯები გადადგას და დეკანოზი მამალაძე გაათავისუფლოს.

  • "უნდა გვესმოდეს, რომ ჩემი ძმის მდგომარეობა არის უმძიმესი! მისი პატიმრობაში დატოვებით შესაძლოა დადგეს უმძიმესი, ლეტალური შედეგიც კი", — წერს ის.