გადაცემა ინტერVIEW-ში დასმულ შეკითხვას, რატომ უწოდა ბიძინა ივანიშვილმა მოსამართლე ლევან მურუსიძეს სასამართლოს დამოუკიდებლობის გარანტი, ყოფილმა პრემიერმა უპასუხა, რომ მურუსიძემ ნაციონალური მოძრაობისგან გათავისუფლება მოახერხა და სწორედ ეს აღიზიანებს ნაციონალურ მოძრაობასაც:

"მართლაც შევხვდი მურუსიძეს, მანამდე შევხვდი კუბლაშვილს და მასთანაც მქონდა საუბარი და თხოვნა, რომ როგორმე სასამართლო იყოს სამართლიანი და გათავისუფლდნენ ძველი გუნდის ზეწოლისგან და ახალი გუნდი არ იკადრებს და არც უკადრია, რომ ჩაერიოს სასამართლო სისტემაში და მართლაც ეს დავიცავით ჩემი პრემიერობის დროს და ეს განუხრელად გრძელდება".

მისი თქმით, მას შემდეგ, რაც დარწმუნდა რომ კუბლაშვილი ვერ ახერხებდა გავლენისგან გათავისუფლებას, ის მურუსიძეს შეხვდა და სთხოვა მას, გათავისუფლებულიყო ძველი ხელისუფლების წნეხისგან და პირობა მისცა მას, რომ ახალი ხელისუფლება მის საქმიანობაში არ ჩაერეოდა:

"ამავდროულად წუხილიც გამოითქვა, რომ მათ ხელფასები ჰქონდათ ძალიან დაბალი, რადგან სასამართლო მიკერებული იყო პროკურატურაზე, ძალიან დათრგუნული იყო ის, ვინაიდან პროკურორი და ადეიშვილი განაგებდნენ. მოსამართლეები შეგვიძლია მსხვერპლად დავასახელოთ იმ სისტემის, როგორი სისტემაც მაშინ არსებობდა".

ივანიშვილის განმარტებით, როდესაც მურუსიძე აღნიშნულ თანამდებობაზე აირჩიეს, არავის პროტესტის გრძნობა არ გასჩენია და არ უთქვამს, რომ ის ცუდი კაცი იყო. ივანიშვილის განმარტებით, იყო 2 გზა, ან მოსამართლეებს ისე უნდა მოქცეოდნენ, როგორც სააკაშვილი, ან დალოდებოდნენ, ახალი ხელისუფლება არჩეულიყო და თავად გათავისუფლებულიყო ძველი ზეწოლისგან:

"ის, რომ მოგვიანებით მურუსიძეზე ამხელა დალღა აგორდა, ამ ტალღებს ვინ აგორებს, ვისი ხელწერაა კარგად ვიცით. ამას მხოლოდ ნაციონალური მოძრაობა ახერხებს. რატომ ააგორეს მურუსიძეზე ეს ტალღა, ჩემში საპირისპირო ეჭვს კი არ ბადებს, რომ ცუდად იქცევა, ძალიან დიდი ალბათობით მან მოახერხა და გაათავისუფლდა ნაციონალური მოძრაობის ზეწოლისგან".