არასამთავრობო ორგანიზაციები და მშვიდობის საკითხზე მომუშავე პირები აცხადებენ, რომ ეს თარიღი აფხაზეთის ომის დასრულებიდან 29 წლის შემდეგ კიდევ ერთხელ ახსენებს საზოგადოებას ქართველი და აფხაზი ხალხის წარსულ ტრაგედიებს და განგრძობადი კონფლიქტის მძიმე რეალობას.

რატომ არის მნიშვნელოვანი: ავტორების განცხადებით, ასეთ რთულ ვითარებაში მნიშვნელოვანია, რომ საქართველო მშვიდობის შენარჩუნებას ახერხებს და კონფლიქტების მხოლოდ მშვიდობიან მოგვარებას უჭერს მხარს.

  • მათივე თქმით, ამის მიუხედავად, კონფლიქტების ტრანსფორმაციისა და ადამიანის უფლებების დაცვის კუთხით გაწეული ძალისხმევა, მაინც არასაკმარისი და სუსტი რჩება;
  • "მიუღებელია ომისა და მშვიდობის საკითხების ვიწრო პოლიტიკური ინტერესებისთვის გამოყენება: ხელისუფლება ცდილობს ომის საკითხით სპეკულირებას და მის ოპონენტებს საქართველოს ომში ჩათრევის მსურველებად შერაცხვას";
  • არასამთავრობოები და მშვიდობის საკითხზე მომუშავე პირების განცხადებით, გარკვეული ოპოზიციური პარტიები წარსულში დატრიალებულ ტრაგედიებს საკუთარი პოლიტიკური კაპიტალის გასაზრდელად იყენებენ.
  • მათივე თქმით, ყველა ერთად საქართველოს მოსახლეობის ტრავმებს და შიშებს პოლიტიკურ იარაღად იყენებს, რასაც კავშირი არ აქვს არც მშვიდობასთან და არც სამართლიანობასთან.

კონტექსტი: განცხადებაში აღნიშნულია, რომ შექმნილ ვითარებაში, როდესაც საქართველო ბეწვის ხიდზე გადის.

  • მათი თქმით, პოლიტიკოსებმა, პოლიტიკურმა პარტიებმა და ხელისუფლების წარმომადგენლებმა უნდა გაიაზრონ პასუხისმგებლობა და შეთანხმებულად იმოქმედონ ამ რისკების თავიდან ასაცილებლად.

განცხადების ავტორები მოუწოდებენ ხელისუფლებას, მმართველ და ოპოზიციურ პარტიებს, საქართველოს გრძელვადიანი სტრატეგიული ინტერესები დააყენონ მოკლევადიან, ვიწროპარტიულ და პიროვნულ ინტერესებზე მაღლა;

  • აწარმოონ შინაარსიანი, საკითხებზე ორიენტირებული და კეთილსინდისიერი დიალოგი ერთმანეთთან, რომლის მთავარი მიზანი იქნება ქვეყნისთვის უმოკლეს დროში ევროკავშირის კანდიდატის სტატუსის მოპოვება;
  • "მხოლოდ ინსტიტუციური და დემოკრატიული რეფორმებით არის შესაძლებელი მდგრადი მშვიდობის, უსაფრთხოების და განვითარების მიღწევა ქვეყანაში".

გარდა ამისა, არასამთავრობო ორგანიზაციები და მშვიდობის საკითხზე მომუშავე პირები აცხადებენ, რომ ხელისუფლებამ უნდა გააკეთოს ახალი, მოქნილი, ორმხრივად სასარგებლო შეთავაზებები გამყოფი ხაზების სხვადასხვა მხარეს მცხოვრები, კონფლიქტით დაზარალებული მოსახლეობისთვის.

  • ასევე, სამოქალაქო საზოგადოების და სხვადასხვა პოლიტიკური ჯგუფების ჩართულობით, შეიმუშაოს არსებულ უსაფრთხოების გამოწვევებზე რეაგირების, კონფლიქტებით დაზარალებული მოსახლეობის უფლებების დაცვის და კონფლიქტების ტრანსფორმაციის რეალური სამოქმედო გეგმა.