საუბარია ქართული ოცნების დეპუტატის მიერ მაუწყებლობის შესახებ კანონში შესატან ცვლილებებზე. გაერთიანებული კომიტეტის სხდომას, სადაც კანონპროექტს განიხილავდნენ NGO-ებისა და მედიის წარმომადგენლები ესწრებოდნენ.

რატომ არის მნიშვნელოვანი: კანონპროექტის მიღებას აკრიტიკებენ როგორც არასამთავრობო ორგანიზაციების წარმომადგენლები, ასევე, მედიისა და ოპოზიციის ნაწილი.

• კრიტიკული მედიების მიმართ ხელისუფლების რიტორიკის გათვალისწინებით, დაგეგმილი ცვლილებები ტოვებს განცდას, რომ ეს, შესაძლოა, მედიის შეზღუდვის მორიგი მცდელობა იყოს.

დეტალები: შესატანი ცვლილები თვითრეგულირების საკითხების რეგულირების სფეროში გადატანას გულისხმობს.

• ინიციატორები დავით სონღულაშვილი, ეკა სეფაშვილი, ბეჟან წაქაძე, ისკო დანესი, ბექა ოდიშარია, ლევან მგალობლიშვილი, გიორგი ამილახვარი, გელა სამხარაული, ბაია კვიციანი, ირაკლი მეზურნიშვილი და ქეთევან დუმბაძე არიან.

პასუხის უფლება: კანონპროექტში სწორედ ასეთი ცნება გაჩნდა, მისი გამოყენება კი შეუძლია პირს, "რომლის კანონიერი ინტერესები, განსაკუთრებით რეპუტაცია და სახელი შეილახა გადაცემაში არასწორი ფაქტების გადაცემით".

• ინიციატორების თანახმად, დაინტერესებული პირი უფლებამოსილია "მოსთხოვოს შესაბამის მაუწყებელს მცდარი ფაქტის თანაზომადი საშუალებებითა და ფორმით შესწორება ან უარყოფა".
• ამასთან, უარის შემთხვევაში, გაასაჩივროს კომისიაში ან სასამართლოში.

ავტორები ცვლილებების აუცილებლობას აიდიოვიზუალური მედიამომსახურების ევროდირექტივასთან საქართველოს კანონმდებლობის შესაბამისობაში მოყვანით ხსნიან.

• მათ დაეთანხმა პარლამენტის თავმჯდომარე, შალვა პაპუაშვილი და ამტკიცებდა, რომ კანონის მიღება ევროკავშირთან დაახლოებითაა განპირობებული.
• მისი თქმით, ევროკომისიამ წერილით მათ რამდენჯერმე მიმართა, რათა საქართველოში ამ დირექტივის იმპლემენტაცია მომხდარიყო.
• ამავდროულად პაპუაშვილმა "სრული პასუხისმგებლობით" განაცხადა, რომ კანონპროექტის ეს ვერსია შესაბამისობაშია ევროკავშირის საუკეთესო პრაქტიკასთან.
• რაც შეეხება გაჩენილ კითხვებს, მან თქვა, რომ ეს ყველაფერი ღია ფორმატში იქნება განხილული.

კიდევ რა იცვლება: ცვლილებები, ასევე, ისეთი პროგრამის ან რეკლამის გავრცელებას კრძალავს, "რომელიც შეიცავს პირის ან ჯგუფის მიმართ შეზღუდული შესაძლებლობების, ეთნიკური, სოციალური წარმომავლობის, გენდერის, სქესის, გენდერული მიკუთვნების;

• ასევე, რასის, რელიგიის ან რწმენის, სექსუალური ორიენტაციის, კანის ფერის, გენეტიკური მახასიათებლების, ენის, პოლიტიკური ან სხვა შეხედულებების ეროვნული უმცირესობის წევრობის, ქონების, დაბადების ან ასაკის ნიშნით ძალადობის ან ზიზღის წაქეზებას".
• გარდა ამისა, იკრძალება ისეთი პროგრამის ან რეკლამის გავრცელება, რომელიც ტერორიზმისკენ მოწოდებას შეიცავს.

მედიის ადვოკატირების კოალიციის შეფასებით, ცვლილებები გამოხატვის თავისუფლების შეზღუდვის რისკებს ქმნის და მიიჩნევენ, რომ პარლამენტმა კანონპროექტი შინაარსობრივ რეგულირებასთან დაკავშირებული საკითხების გარეშე უნდა მიიღოს.

• "აღნიშნულ საკითხებზე შეიქმნას სამუშაო ჯგუფი, რომელიც იმსჯელებს ისეთ ეფექტიან მექანიზმებზე, რომლებიც საფრთხეს არ შეუქმნის გამოხატვის თავისუფლებას".
• პრობლემურად მიიჩნევენ პასუხის სიძულვილის ენის და ტერორიზმის მოწოდების პროგრამისა და რეკლამის რეგულირებასაც და აცხადებენ, რომ ეს საკითხიც შინაარსობრივი თვითრეგულირებაში შემავალი საკითხების რეგულირებაში გადატანას ეხება.
• 16 სექტემბერს მათ პარლამენტს მოუწოდეს, დაიცვან ევროკავშირის მიერ მიცემული რეკომენდაციები და პროცესი ინკლუზიური გახადონ.

ლელოს წევრის, ანა ნაცვლიშვილის განცხადებით, ქართული ოცნების პოლიტიკური სურვილია, რომ მორიგ ჯერზე იერიში მიიტანონ მედიის თავისუფლებაზე.

• რაც არის ძალიან ცუდი და დამაზიანებელი, არის ის, რომ სწორედ ევროდირექტივის შესრულების საფარქვეშ სურთ მათ, რომ ეს დამაზიანებელი ცვლილებები მიიღონ".

არქივიდან: წარსულში მაუწყებლის შესახებ კანონში შესატან იმჟამინდელ ცვლილებებსა და თვითრეგულირების საკითხების სახელმწიფოს რეგულირების სფეროში გადატანას მედიის ადვოკატირების კოალიციის კრიტიკა მოჰყვა.

• საუბარი იყო კომუნიკაციის კომისიის შეთავაზებულ ცვლილებებზე, რომლის მიხედვითაც შესაძლებელი ხდებოდა მედიის თვითრეგულირების ორგანოს გადაწყვეტილება კომუნიკაციების კომისიაში ან სასამართლოში გასაჩივრებულიყო.
• კოალიცია აცხადებდა, რომ ეს გამოხატვის თავისუფლების თვითნებური, დაუსაბუთებელი შეზღუდვის რისკებს ზრდიდა.
• ნათქვამი იყო, რომ კანონპროექტი 2010/13/EU დირექტივის მოთხოვნებს ამოფარებული მცდელობაა.