საქართველოს შინაგან საქმეთა სამინისტროს ინფორმაციით, მათ ბაბუის მკვლელობის ბრალდებით შვილიშვილი და შვილიშვილის მეგობარი დააკავეს. მკვლელობა, რომლის გამოც ორი პირი დააკავეს თბილისში, ბუდაპეშტის ქუჩაზე 9 აპრილს მოხდა.

"გამოძიებით დადგინდა, რომ მ.კ.-მ და მისმა მეგობარმა, გ.გ.-მ მიმდინარე წლის 9 აპრილს თბილისში, ბუდაპეშტის ქუჩაზე, მ.კ.-ს ბაბუას, 1940 წელს დაბადებულ ჯ.კ.-ს, ანგარების მიზნით, მისსავე საცხოვრებელ ბინაში ცივი იარაღით სასიკვდილო ჭრილობები მიაყენეს, შემდეგ, დანაშაულის დასაფარად, ბინაში ხანძარი გააჩინეს და შემთხვევის ადგილიდან მიიმალნენ," - აცხადებენ შსს-ში.

მათივე ინფორმაციით, ორივე დაკავებული ბრალდებას აღიარებს.

საქმეზე გამოძიება სისხლის სამართლის კოდექსის 109-ე მუხლით მიმდინარეობს. ეს მუხლი დამამძიმებელ გარემოებაში ჩადენილი განზრახ მკვლელობას გულისხმობს.