დროას ლიდერის, ელენე ხოშტარიას განცხადებით, მართლმსაჯულებისა და პროკურატურის სისტემაში ივანიშვილის "ოლიგარქიული საყრდენები" მუშაობენ, რომლებიც პოლიტიკურ დავალებებს ასრულებენ. ბრიფინგზე მან პროკურორები ჩამოთვალა და აღნიშნა, რომ მნიშვნელოვანია, დასავლელ პარტნიორებს ჰქონდეთ ინფორმაცია, "რაზე დგას ოლიგარქიული მმართველობა".

რატომ არის მნიშვნელოვანი: ხოშტარიამ უკვე მოითხოვა ევროპარლამენტის რეზოლუციის საბოლოოდ შესრულება და ბიძინა ივანიშვილისთვის სანქციების დაწესება.

  • მან დაასახელა ბიზნესმენებიც რომლებიც, მისი თქმით, ივანიშვილის ოლიგარქიული მმართველობის საყრდენები არიან და მოითხოვა 9 მოსამართლის სანქცირებაც.

  • ოპოზიცია სანქციების დაწესებაზე სამუშაოდ ვაშინგტონსა და ბრიუსელში გეგმავს ვიზიტს.

დეტალები: მის მიერ დასახელებულ პირებს შორის არიან გენერალური პროკურორი ირაკლი შოთაძე და ყოფილი გენერალური პროკურორი ოთარ ფარცხალაძე.

  • ასევე არიან პროკურორები ჯარჯი წიკლაური, მიხეილ სადრაძე, ამირან გულუაშვილი, რევაზ ბაღაშვილი.
  • ხოშტარია აცხადებს, რომ ფარცხალაძე პროკურატურას აკონტროლებს.
  • ბაღაშვილზე საუბრისას კი აღნიშნავს, რომ ის საგამოძიებო ნაწილის უფროსია და მის ხელში გადის პოლიტიკური საქმეები, ამიტომ არის ერთ-ერთი საკვანძო ფიგურა პოლიტიკური მართლმსაჯულების აღსრულებაში.

პასუხად, ერთ-ერთმა პროკურორმა, ჯარჯი წიკლაურმა ფორმულასთან თქვა, რომ ნებისმიერი პროკურორი ასრულებს კანონის მითითებებს, ასევე ხელმძღვანელის კანონიერ დავალებებს. მისი თქმით, ამ საკითხზე სერიოზული კომენტარის გაკეთება რთულია.

  • სადრაძის თქმით, ხოშტარიას ბრალდება პროკურორებზე "სამართლებრივ საფუძველს მოკლებულია"

არქივიდან: შოთაძემ გენერალური პროკურორის თანამდებობა 2018 წელს, მას შემდეგ დატოვა, რაც სასამართლოს გადაწყვეტილებით ხორავას ქუჩის საქმეზე არასრულწლოვანი დავით სარალიძის მკვლელი ვერ გამოვლინდა და პროტესტი დაიწყო. თუმცა 2020 წლის 18 თებერვალს ქართულმა ოცნებამ ის გენერალურ პროკურორად დააბრუნა.

  • წიკლაური ისეთი საქმეების პროკურორია, როგორიცაა ე.წ. ციანიდის, კარტოგრაფების, კაბელების, ასევე მიხეილ სააკაშვილის საქმე.
  • სადნაძე და გულუაშვილი ნიკა მელიას საქმეს პროკურორები იყვნენ.