სტატისტიკის ეროვნული სამსახურის ცნობით, 2017 წლის აპრილში საქართველოში ინფლაცია 0,1 პროცენტი, ხოლო წლიური ინფლაციის დონემ 6,1 პროცენტი შეადგინა.

საქსტატის მონაცემებით, აპრილში ინფლაციის მაჩვენებლის ფორმირებაზე ძირითადი გავლენა იქონია ფასების ცვლილებამ სურსათზე და უალკოჰოლო სასმელებზე. მონაცემების მიხედვით, ამ ჯგუფში ფასები 1,4 პროცენტით გაიზარდა, რაც ინფლაციის მთლიან მაჩვენებელზე 0,42 პროცენტული პუნქტით აისახა. ასევე, ფასები გაიზარდა ხილსა და ყურძენზე (8,8 პროცენტი), ბოსტნეულსა და ბაღჩეულზე (7,0 პროცენტი), ხორცსა და ხორცის პროდუქტებზე (1,6 პროცენტი).

ფასები შემცირდა ზეთზე, ცხიმზე და თევზეულზე. ამ ჯგუფში ფასები შემცირდა 1,7 პროცენტით და ჯგუფის წვლილმა ინფლაციის მთლიან მაჩვენებელში -0,23 პროცენტული პუნქტი შეადგინა. ფასები შემცირდა სატრანსპორტო საშუალებების შეძენაზე (-3,3 პროცენტი) და პირადი სატრანსპორტო საშუალებების ექსპლუატაციაზე (-2,4 პროცენტი).

სტატისტიკის სამსახურის ცნობით, წლიური ინფლაციის ფორმირებაზე ძირითადი გავლენა იქონია იმან რომ ფასების 7,6 პროცენტიანი მატება დაფიქსირდა სურსათისა და უალკოჰოლო სასმელების ჯგუფზე, რაც 2,31 პროცენტული პუნქტით აისახა წლიური ინფლაციის მთლიან მაჩვენებელზე.

ასევე, წლიური ინფლაციაზე გავლება იქონია ტრანსპორტის ჯგუფში ფასების ზრდამ. კერძოდ, ფასები გაიზარდა 17,6 პროცენტით და ჯგუფის წვლილმა ინფლაციის მთლიან მაჩვენებელში 2,11 პროცენტული პუნქტი შეადგინა. ალკოჰოლური სასმელებისა და თამბაქოს ჯგუფში ფასები გაიზარდა 14,5 პროცენტით, რაც წლიურ ინფლაციაზე 0,94 პროცენტული პუნქტით აისახა. ფასები გაიზარდა 6,1 პროცენტით, რაც 0,54 პროცენტული პუნქტით აისახა მთლიანი ინდექსის ზრდაში.