უკრაინის გენერალური პროკურორის, ირინა ვენედიქტოვას განცხადებით, ბუჩას მკვლელობებში ბრალდებული პირველი სამხედროს ვინაობა დაადგინეს. ამის შესახებ ის Facebook-ზე წერს და აცხადებს, რომ ის ულიანოვსკის რეგიონის რუსეთის ეროვნული გვარდიის ჯარების ფედერალური სამსახურის მართვის განყოფილების მეთაურია.

პროკურორის თქმით, ბუჩას პროკურორებმა და პოლიციამ დაადგინეს, რომ სწორედ მან მოკლა ოთხი შეუიარაღებელი მოქალაქე ბუჩაში 18 მარტს. მათივე ინფორმაციით, 29 მარტს მან აწამა კიდევ ერთი მშვიდობიანი მოქალაქე, ერთ-ერთი პროუკრაინულად განწყობილი ადგილობრივი სარდაფში წაიყვანა და სცემა.

კიევის ოლქი რუსი ოკუპანტებისგან 2 აპრილს გათავისუფლდა. ირპენმა, ბუჩამ, გოსტომელმა და სხვა ქალაქებმა, სადაც უკრაინის ჯარები შევიდნენ, მსოფლიოს ხელახალი გამოღვიძება აიძულა.

მედიაში გავრცელდა ფოტოები ბუჩას ქუჩებიდან, რომელიც სავსე იყო ცხედრებით — მათ ნაწილს ხელები ჰქონდათ შეკრული, ნაწილის გვერდით ველოსიპედები ეყარა, ნაწილი კი, მინიმუმ, სამი კვირის წინ მაინც იყო მოკლული.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში