კიევის რაიონის პოლიციის განცხადებით, ბუჩაში კიდევ ერთ სამარხს მიაგნეს, სადაც 3 ადამიანის ცხედარი იპოვეს. საფლავი სოფელ მიროცკესთან მდებარე ტყეში 29 აპრილს აღმოაჩინეს. პოლიციის ინფორმაციით, ოკუპანტებმა ისინი აწამეს შემდეგ კი კვალის დაფარვის მიზნით მოკლული კაცები ორმოში ჩაყარეს და მიწა დააყარეს.

"მსხვერპლებს დიდი ხნის განმავლობაში აწამებდნენ, მათ კიდურებზე ტყვიით მიყენებული ჭრილობები აღმოვაჩინეთ. ბოლოს თითოეულ მათგანს ყურში ტყვია ესროლეს. ეს ოკუპანტების მიერ გაკეთებული კიდევ ერთი მასობრივი სამარხია ბუჩაში, მრავალტანჯულ დასახლებაში, სადაც ათასზე მეტი მოქალაქე აწამეს და მოკლეს", — ამბობს კიევის ოლქის პოლიციის უფროსი.

უწყების განცხადებით, მთლიანობაში, გამომძიებლებმა გამოიკვლიეს კიევის რეგიონში რუსი ოკუპანტების მიერ მოკლული მშვიდობიანი მოქალაქეების 1202 ცხედარი.

გუშინ, 29 აპრილს ვოლოდიმირ ზელენსკიმ თქვა, რომ კიევის რეგიონში კიდევ ერთი მასობრივი საფლავი აღმოაჩინეს, რომელშიც 900 ცხედარი იყო. მისი თქმით, ამ ეტაპზე არავინ იცის, სულ რამდენი ადამიანი დაიღუპა.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში