უკრაინის საგარეო საქმეთა სამინისტრო აცხადებს, რომ ავსტრიის საგარეო საქმეთა მინისტრის განცხადებით ქვეყნის ევროკავშირში გაწევრიანებასთან დაკავშირებით იმედგაცრუებულია. ამის შესახებ Unian-ს უწყების წარმომადგენელმა, ოლეგ ნიკოლენკომ განუცხადა.

"ჩვენ იმედგაცრუებული ვართ ავსტრიის საგარეო საქმეთა მინისტრის განცხადებით უკრაინის ევროპულ მომავალზე. ამას მივიჩნევთ სტრატეგიულად წინდაუხედავ ნაბიჯად და ევროპული ინტერესების საწინააღმდეგოდ", — ამბობს ნიკოლენკო.

ადგილობრივმა მედიამ, Heute-მ გაავრცელა ინფორმაცია, რომ ავსტრიის საგარეო საქმეთა მინისტრი, ალექსანდერ შალენბერგი უკრაინის ევროკავშირში გაწევრიანების წინააღმდეგია. გამოცემის ცნობით, მინისტრი განმარტავს, რომ უნდა მოიძებნოს სხვა მოდელი, გარდა წევრობისა.