დღეს თიბისი ბანკის ორგანიზებით, თიბისი გალერეაში ლეგენდარული ქართველი მხატვრის, ლადო გუდიაშვილის გრაფიკული ნამუშევრები გამოიფინა.

"სატირული გრაფიკა" ასე ჰქვია გამოფენას, რომელშიც ძირითადი აქცენტი 40-50-იან წლებზეა გაკეთებული, სწორედ ამ პერიოდში შექმნა გუდიაშვილმა ნახატები ამ ჟანრში.

"ყველაფერი ის, რაც დღეს აქ არის გამოფენილი, აგებულია ადამიანზე, ადამიანის განცდებზე და მე ვფიქრობ, რომ არაჩვეულებრივი ექსპოზიციაა. იმ რეჟიმში როდესაც ეს ნამუშევრები იქმნებოდა, საკმაოდ თამამი და გმირული ნაბიჯიც კი იყო ის, რაც ლადო გუდიაშვილმა გააკეთა", - თქვა გამოფენის გახსნაზე მამუკა ხაზარაძემ.

ტონირებულ ქაღალდზე ტუშით შესრულებული ნამუშევრები მხატვრისთვის საკმაოდ რთულ პერიოდს ემთხვევა, როდესაც საბჭოთა რეჟიმი განსაკუთრებული სისასტიკით გამოირჩეოდა. სწორედ რეპრესიების ეპოქასა და მის მიმართ პროტესტს გამოხატავს გუდიაშვილი თავის ნამუშევრებში, აქცენტირებულია წინააღმდეგობა როგორც სტალინის, ისე ფაშიზმის წინააღმდეგ.

თიბისი გალერეაში გამოფენილი 35 ნახატი, დამთვალიერებელს ათ მაისამდე შეუძლია ნახოს.