2017 წელს თიბისიმ გადაწყვიტა, რომ ახალი ბიზნესებისა და იდეებისთვის მხარი დაეჭირა და პროგრამა სტარტაპერი შექმნა, რომელსაც უკვე 5 წელი შეუსრულდა. ამ დროის განმავლობაში სტარტაპერით უკვე 55 000-ზე მეტმა დამწყებმა ქართულმა ბიზნესმა ისარგებლა. სტარტაპერი დამწყებ ბიზნესებს როგორც ფინანსურ, ასევე არაფინანსურ მხარდაჭერას სთავაზობს. უფრო ზუსტად კი სტარტაპერი ახალ ბიზნესებს შემდეგ მიმართულებებს სთავაზობს: საბანკო პროდუქტებს, სტარტაპ განათლებას, სტარტაპ შეთავაზებას, მედია მხარდაჭერას, ინდივიდუალურ კონსულტაციებს, ტრენინგებს, სესხს სტარტაპისთვის და სტარტაპ ივენთებს.

სტარტაპერის ერთ-ერთი მონაწილეა ღვინის მაღაზია-ბარი საამური, რომელიც დღეს ფაბრიკის ტერიტორიაზე მდებარეობს და მომხმარებლების დიდ მოწონებასაც იმსახურებს. იმის შესახებ, თუ რა გზა გაიარა საამურმა წარმატებამდე და რა გამოარჩევს მას ქართულ ბაზარზე, მაია ჭოხონელიძე მოგვიყვება.

დავიწყოთ იმით, თუ რატომ გადაწყვიტეთ საამურის შექმნა და როგორ მოგივიდათ ეს იდეა?

საამურის შექმნა იმიტომ გადავწყვიტე, რომ ზოგადად, ღვინო ძალიან მიყვარს და თან ჩემი ქმარიც მეღვინეა, რომელიც 2006 წლიდან საკუთარ ღვინოს აწარმოებს. ყოველთვის მინდოდა, რომ საკუთარი ბარი მქონოდა, რომელშიც ახალგაზრდებს შესაძლებლობა ექნებოდათ, რომ ბუნებრივი ღვინო დაელიათ და ამ კულტურას თავიდან გასცნობოდნენ.

რას სთავაზობს საამური თავის მომხმარებლებს და თქვენი აზრით, რა უპირატესობა აქვს კონკურენტებთან მიმართებით?

ჩვენს მომხმარებლებს სხვადასხვა მარნის ბუნებრივ ღვინოს ვთავაზობთ. გარდა ამისა, გვაქვს საამურის ხაზიც და სხვადასხვა მეღვინესთან თანამშრომლობით ჩვენი ბრენდის სახელით ვასხამთ ღვინოს, რომელიც ფინანსურად უფრო ხელმისაწვდომია. კონკურენციას რაც შეეხება, ვფიქრობ, რომ ყველა ღვინის კომპანიასა თუ ბარს საერთო მიზანი გვაქვს და გვსურს, რომ ჩვენი მომხმარებელი ღვინით ვასიამოვნოთ.

რადგან ქართულ ბაზარზე ღვინის სხვადასხვა მაღაზია თუ ბარი უკვე არსებობს, ბიზნესის პირველ ეტაპზე გადააწყდით თუ არა გამოწვევებს?

საამურში მხოლოდ ბუნებრივი ღვინოები გვაქვს, როგორც ქართული, ასევე უცხოური წარმოების. ამიტომ, თავიდანვე ვიცოდით, რომ უფრო რთულ პროდუქტთან გვქონდა საქმე და ბიზნესის დაწყება რთული იქნებოდა. როცა საამურისთვის ფართი ვიქირავეთ, პანდემიაც სწორედ მაშინ დაიწყო და სარემონტო სამუშაოებსაც ვერ ვიწყებდით, რადგან შეზღუდვების გამო ქვეყანაში ყველაფერი გაჩერებული იყო. ასე რომ, ბიზნესის დაწყება თავიდან საკმაოდ რთული იყო, თუმცა ერთი წლის შემდეგ შეგვიძლია ვთქვათ, რომ მომხმარებლების რაოდენობა თანდათან მატულობს და ჩვენს თავდაპირველ მიზანს მივაღწიეთ.

საამური თიბისის სტარტაპერის ერთ-ერთი წარმატებული მონაწილეა. საინტერესოა, როდის გახდით ამ პროგრამის მონაწილე, რა ეტაპზე იყო მაშინ თქვენი ბიზნესი და რა ტიპის მხარდაჭერა მიიღეთ თიბისისგან?

რეალურად, ბიზნესი დაწყებული არ გვქონდა, რადგან როცა ბარის გაკეთება გადავწყვიტეთ, დაახლოებით ერთ თვეში პანდემია დაიწყო. ასე რომ, ამ პერიოდში შეჩერებულები ვიყავით და ვირუსთან დაკავშირებით მოვლენების განვითარებას ველოდებოდით. სწორედ ამ დროს ფაბრიკაში სივრცე გამოჩნდა და გადავწყვიტეთ, რომ ეს შანსი არ დაგვეკარგა. შემდეგ კი ფაბრიკამ სწორედ ჩვენი პროექტი აირჩია, თუმცა ჩვენ ამხელა სივრცისა და ბიზნესისთვის საკმარისი თანხა არ გვქონდა და გადავწყვიტეთ, რომ სტარტაპ სესხით გვესარგებლა. ეს სესხი საამურის შექმნის პირველ ეტაპზე ძალიან დაგვეხმარა და მე პირადად არც კი მეგონა, თუ ასე მარტივად, სწრაფად და არცთუ ისე ბევრი ბიუროკრატიული მოთხოვნით სესხის აღება შეიძლებოდა. გარდა სტარტაპ სესხისა, სტარტაპერში ჩართვიდან დღემდე თიბისი მედია მხარდაჭერითაც გვეხმარება და ცდილობს, რომ საამურის შესახებ ბევრმა ადამიანმა გაიგოს.

და ბოლოს, რას ურჩევდით იმ ადამიანებს, რომლებსაც საკუთარი ბიზნესის დაწყება სურთ?

ვურჩევდი, რომ აუცილებლად დაიწყონ. იმიტომ, რომ როცა მოქმედებაში ხარ და აქტიური ხარ, ყოველთვის ჩნდება ახალ-ახალი შესაძლებლობები. ამიტომ თუ ბიზნესის იდეა აქვთ, მისი დაწყება არ უნდა გადადონ.

თიბისიმ 2017 წელს საქართველოში დამწყები ბიზნესების დაფინანსება დაიწყო და პროგრამა სტარტაპერი შექმნა. პროგრამა სტარტაპერის მიზანი ქვეყანაში სტარტაპების მხარდაჭერა და ბიზნესის დაწყების პოპულარიზაციაა. ამ დრომდე სტარტაპერებზე სესხის სახით გაცემულია 315 მილიონ ლარზე მეტი. იდეის ბიზნესად ქცევაში პროგრამა სტარტაპერი ადამიანებს შემდეგი მიმართულებებოთ სთავაზობს მხარდაჭერას: საბანკო პროდუქტები, სტარტაპ განათლება, სტარტაპ შეთავაზება და მედია მხარდაჭერა. 5 წლის განმავლობაში უკვე 55 000-ზე მეტმა დამწყებმა ბიზნესმა ისარგებლა სხვადასხვა მხარდაჭერით.