უკრაინის პრეზიდენტმა, ვოლოდიმირ ზელენსკიმ გაეროში სიტყვით გამოსვლისას უშიშროების საბჭოს წევრებს ორი გზა შესთავაზა — ან გარიცხონ რუსეთი, ან თავი გაიუქმონ. მან კიდევ ერთხელ აღნიშნა, რომ უკრაინას, ევროპას და მსოფლიოს სჭირდება მშვიდობა.

"ორი გზა გაქვთ – ან გარიცხოთ რუსეთი, როგორც ომის წყარო, რათა რუსეთმა არ დაბლოკოს საკუთარ აგრესიასთან დაკავშირებული გადაწყვეტილებები და ამ შემთხვევაში ჩვენ ყველაფერს გავაკეთებთ მშვიდობის დასამყარებლად, ან მეორე ვარიანტია საკუთარი თავის გაუქმება. თუ ლაპარაკის გარდა სხვა არაფერი შეგიძლიათ, სხვა გზა აღარ გაქვთ. უკრაინას სჭირდება მშვიდობა, ევროპას სჭირდება მშვიდობა, მთელ მსოფლიოს სჭირდება მშვიდობა", — თქვა მან.

ზელენსკიმ საბჭოს მოუწოდა, უზრუნველყოს უკრაინის უსაფრთხოების გარანტიები და დააკისროს პასუხისმგებლობა რუსეთს.

"სად არის უსაფრთხოება, რომლის გარანტიაც უშიშროების საბჭომ უნდა უზრუნველყოს? ის აქ არ არის. მიუხედავად იმისა, რომ არსებობს უშიშროების საბჭო, სად არის მშვიდობა? რა არის ის გარანტიები, რომლებიც გაერთიანებული ერების ორგანიზაციამ უნდა უზრუნველყოს?", — თქვა მან.

უკრაინის პრეზიდენტმა ხაზგასმით აღნიშნა, რომ რუსეთის წინაშე პასუხისმგებლობა "გარდაუვალი უნდა იყოს".