2021 წელი Sex and the City-ის გულშემატკივრებისთვის განსაკუთრებული აღმოჩნდა — დიდხნიანი პაუზის შემდეგ მათი საყვარელი პერსონაჟები ახალი თავგადასავლებითა და ისტორიებით დაბრუნდნენ. სერიალის ახალ სეზონში, სახელად And Just Like That ვიხილეთ თუ როგორ შეიცვალა შარლოტას (კრისტენ დევისი), კერისა (სარა ჯესიკა პარკერი) და მირანდას (სინტია ნიქსონი) ცხოვრება.

როგორც ჩანს, შარლოტა, კერი და მირანდა თავს დიდი ხნით აღარ მოგვანატრებენ. ცოტა ხნის წინ ოფიციალურად დადასტურდა, რომ And Just Like That მეორე სეზონით დაბრუნდება.

"მოხარული და აღტაცებული ვარ, რომ მეტი ისტორიის მოყოლა შემიძლია ამ სიცოცხლით სავსე და გაბედული პერსონაჟების დახმარებით, რომლებსაც ნიჭიერი და საოცარი მსახიობები განასახიერებენ", — განაცხადა სერიალის ერთ-ერთმა შემქმნელმა მაიკლ პატრიკ კინგმა.

ჯერჯერობით მეორე სეზონის შინაარსთან დაკავშირებული დეტალები ცნობილი არაა. პირველი სეზონის ბოლოს კერი პარიზში მიდის, რათა მისტერ ბიგის ხსოვნას მიაგოს პატივი, მირანდა ჩესთან ერთად ლოს-ანჯელესში მიემგზავრება, შარლოტა კი არაბინარული გენდერული იდენტობის ბავშვის აღზრდასთან დაკავშირებულ გამოწვევებს უმკლავდება. სავარაუდოდ, მეორე სეზონში ამ ისტორიებსა და თემებს შემქმნელები კიდევ უფრო ჩაუღრმავდებიან.

Sex and the City-ის სერიალი 2004 წელს დასრულდა, მასზე გადაღებული მეორე ფილმი კი 2010 წელს გამოვიდა. And Just Like That ჩვენი საყვარელი გმირების ცხოვრების შესახებ ამჯერად 50 წელს გადაცილებული ქალების პერსპექტივით გვიყვება.