კულტურის სამინისტროს განცხადებით, დავით აღმაშენებელზე ფილმის გადასაღებად ლევან კოღუაშვილი შეირჩა. მათი თქმით, დიდგორის ბრძოლის გამარჯვების 900 წლისთავთან დაკავშირებით გამოცხადებულ კონკურსში მეორე ეტაპზე სამი პროექტი იყო გადასული.

უწყებაში ამბობენ, რომ შერჩეული პროექტის ავტორმა და შემოქმედებითმა ჯგუფმა საკონკურსო კომისიის რეკომენდაციების შესაბამისად, დამატებითი სამუშაო უნდა გასწიონ, იმისთვის, რომ საბოლოო არჩევანი მათზე შეჩერდეს.

მათივე ცნობით, პროექტს ახორციელებს კინო იბერიკა, სცენარის ავტორია ლევან კოღუაშვილი, სცენარის თანაავტორი კი ბორის ფრუმინი. უწყების თქმითვე, პროექტში კონსულტანტებად ჩართულები არიან ისტორიკოსები — ზაზა აბაშიძე, მამუკა წურწმუნია, ეკა კვაჭანტირაძე, ფოტოგრაფები — გიორგი მაღრაძე და დიმიტრი გომბერგი. დამდგმელი მხატვარია კოტე ჯაფარიძე, კოსტიუმები ეკუთვნის ნინო ჩუბინიძეს, ხოლო რეკვიზიტები ვალო იმერლიშვილს. პროექტის მიხედვით, ფილმის კინოოპერატორია ფედონ პაპამიქაელი.

"საკონკურსო კომისიის წევრები, რომელთაც კონკურსის სხვადასხვა ეტაპზე პროექტები შეაფასეს და გადაწყვეტილება მიიღეს, არიან: კომისიის თავმჯდომარე — კინორეჟისორი მერაბ კოკოჩაშვილი; მწერალი და დრამატურგი ლაშა (ირაკლი) სამსონაძე; ისტორიკოსი დიმიტრი შველიძე; რეჟისორი ალექსანდრე ქანთარია; მწერალი კონსტანტინე ჯანდიერი; კინორეჟისორი რუსუდან გლურჯიძე; ისტორიკოსი ჯაბა სამუშია", — ნათქვამია განცხადებაში.

უწყებაში აღნიშნავენ, რომ კონკურსის პირველ ეტაპზე 10 განაცხადი მიიღეს, რომელთაგანაც მეორე ეტაპზე 3 პროექტი გადავიდა, თითოეულ მათგანი კი $5 000-ის ეროვნულ ვალუტაში ექვივალენტი თანხის ოდენობით დაფინანსდა.

"თითოეული პროექტის ქულობრივ შეფასებამდე, კომისიამ ცალ-ცალკე მოუსმინა კონკურსანტებს და იმსჯელა წარმოდგენილი განაცხადების თაობაზე, მათ შესაბამისობაზე სამინისტროს მიერ გამოცხადებული კონკურსის მიზნებთან და საკონკურსო პირობებთან. კომისიამ შეაფასა კონკურსის მსვლელობის პროცესში კომისიის მიერ გაცემული რეკომენდაციების შესრულება, კერძოდ, სცენარის შემდგომი განვითარება დრამატურგების ჩართულობითა და მეცნიერთა კონსულტაციით, სცენარის განვითარებაში ისტორიკოსების ჩართვა და თითოეულ სცენარში მთავარი გზავნილის მკაფიოდ წარმოჩენა", — აღნიშნავენ ისინი.

რაც შეეხება რეკომენდაციებს, ვკითხულობთ, რომ შემდეგი ეტაპისთვის "რეჟისორმა, ლევან კოღუაშვილმა უნდა გაითვალისწინოს საკონკურსო კომისიის რეკომენდაციები", რომელიც შემდეგია:

• სცენარის შემდგომი განვითარება გაგრძელდეს დრამატურგების ჩართულობითა და მეცნიერთა კონსულტაციით, რათა დაცულ იქნეს ისტორიული ჩარჩო, ხოლო პერსონაჟების ისტორიულ-ფსიქოლოგიური ტიპაჟები იყოს რეალურობასთან მაქსიმალურად მიახლოებული;
• დავით აღმაშენებლის პიროვნების უფრო ფართოდ გაშლა და მისი ეპოქის გეოპოლიტიკური, რეგიონალური კონტექსტის მეტად წინ წამოწევა. კონკურსის მე-3 ეტაპზე, სამი თვის ვადაში, შერჩეული პროექტის ავტორმა სამინისტროს უნდა წარმოუდგინოს სრულყოფილი სცენარის პირველადი ვერსია (რისთვისაც იგი ფინანსდება 7500 აშშ დოლარის ეკვივალენტი თანხის ოდენობით ეროვნულ ვალუტაში), რომელსაც კვლავ განიხილავს საკონკურსო კომისია. კომისიის მსჯელობის შემდეგ, მის მიერ გამოთქმული მოსაზრებების მიხედვით, კონკურსანტს მიეცემა ერთთვიანი ვადა მე-4 ეტაპის სამუშაოებისათვის, რომლის ფარგლებში მოხდება სცენარის დასრულება. სცენარის საბოლოო ვერსიის წარმატებით ჩაბარების შემთხვევაში, გამარჯვებულ კონკურსანტთან გაფორმდება ხელშეკრულება ფილმის წარმოებაში ჩაშვების დეტალებისა და ვადების შესახებ.

კულტურის სამინისტრომ დიდგორის ბრძოლაში გამარჯვების 900 წლისთავთან დაკავშირებით დავით აღმაშენებლის მოღვაწეობის შესახებ ფილმის გადასაღებად შესარჩევი კონკურსი გასული წლის 12 აგვისტოს გამოაცხადა.