ამერიკის შეერთებული შტატების სახელმწიფო მდივანმა, ენტონი ბლინკენმა გაეროს უშიშროების საბჭოზე სიტყვით გამოსვლის დროს განაცხადა, რომ ის იქ იმყოფება ომის არათუ დასაწყებად, არამედ თავიდან ასაცილებლად. ბლინკენმა აღნიშნა, რომ მის მიერ წარმოდგენილი ინფორმაცია თვეების მანძილზე განვითარებული სიტუაციით დასტურდება.

"მე აქ ვარ არა ომის დასაწყებად, არამედ ომის თავიდან ასაცილებლად. ინფორმაცია, რომელსაც წარმოგიდგენთ, დასტურდება იმით, რაც თვეების მანძილზე ჩვენს თვალწინ ვითარდება. გახსოვდეთ, რომ სანამ რუსეთი ჩვენს გაფრთხილებებს დასცინოდა, 150 000-ზე მეტი ჯარისკაცის მობილიზებას ახდენდა უკრაინის საზღვართან, ისევე, როგორც მასიული სამხედრო თავდასხმის შესაძლებლობას. ამას მხოლოდ ჩვენ არ ვხედავთ. მოკავშირეები და პარტნიორებიც იმავეს ხედავენ",— განაცხადა ბლინკენმა.

ოკუპანტებმა დონბასიდან ლუგანსკის ოლქის ერთ-ერთ დასახლებას ცეცხლი გაუხსნეს, ჭურვი კი საბავშვო ბაღს მოხვდა. ამას უკრაინის პრეზიდენტმა, ვოლოდიმირ ზელენსკიმ "დიდი პროვოკაცია" უწოდა და ხაზი გაუსვა უკრაინაში დიპლომატების დარჩენის აუცილებლობას.

რუსეთის მტკიცების პარალელურად, რომ უკრაინის საზღვრის სიახლოვიდან რუსული ჯარები გაჰყავთ, აშშ-ის პრეზიდენტის ადმინისტრაციის ოფიციალური წარმომადგენელი ამბობს, რომ ბოლო დღეებში უკრაინის საზღვართან რუსი სამხედროების რიცხვი 7 000-ით გაიზარდა. ზელენსკიც უარყოფს, რომ რუსეთის ჯარები გადიან. მისი თქმით, ამას რეალურად ვერ ხედავენ და მხოლოდ ესმით მის შესახებ.

ამერიკის შეერთებული შტატების სახელმწიფო მდივნის, ენტონი ბლინკენის განცხადებით, რუსულ სამხედრო ძალებს უკრაინის საზღვარი არ დაუტოვებიათ. მისი თქმით, რუსეთის ქმედებები და განცხადებები ერთმანეთისგან განსხვავდება.

პენტაგონის ინფორმაციით, ბოლო დღეების განმავლობაში, რუსეთის პრეზიდენტმა, ვლადიმერ პუტინმა უკრაინის საზღვართან და ბელარუსის ტერიტორიაზე დამატებითი სამხედრო ძალები განათავსა.

ევროპული საბჭოს პრეზიდენტის, შარლ მიშელის განცხადებით, რუსეთმა ომსა და დიპლომატიას შორის არჩევანი უნდა გააკეთოს. მისი თქმით, უკრაინის წინააღმდეგ რუსეთის უპრეცედენტო სამხედრო ესკალაცია ევროპაში მშვიდობასა და უსაფრთხოებას უქმნის საფრთხეს.