საქართველოში ევროპის საბჭოს ოფისის მიერ 2018-2021 წელს ჩატარებული კვლევის მიხედვით, ბოლო სამი წლის განმავლობაში უმცირესობების მიმართ ხალხი უფრო პოზიტიურადაა განწყობილი, თუმცა კანონებზე ინფორმირებულობის დონე იგივე რჩება.

ანგარიშში ნათქვამია, რომ ზოგადად, მრავალფეროვნების მიმართ დადებითი დამოკიდებულება 56%-დან 70%-მდე გაიზარდა.

"ადამიანებს ახლა უფრო უადვილდებათ უმცირესობის ჯგუფის დასახელება, როცა ეკითხებიან პირველად რომელი ჯგუფი ახსენდებათ, როცა უმცირესობებზე ფიქრობენ. საზოგადოებას ახლა უფრო დადებითი დამოკიდებულება აქვს, ზოგადად, მრავალფეროვნების და ასევე ეთნიკური და რელიგიური მრავალფეროვნების მიმართ", — ნათქვამია კვლევაში.

ანგარიშში ვკითხულობთ, რომ მრავალფეროვნების მიმართ პოზიტიური დამოკიდებულების გაზრდის მიუხედავად, დისკრიმინაციის, სიძულვილით მოტივირებული დანაშაულისა და სიძულვილის ენის წინააღმდეგ საქართველოს კანონმდებლობის ინფორმირებულობის კუთხით, მცირე ცვლილება თუ შეინიშნება. ამასთან, უცვლელი რჩება რეაგირების მექანიზმებსა და მათ ეფექტიანობაზე ინფორმირებულობა.

კვლევა აჩვენებს, რომ 2018 წელთან შედარებით საზოგადოება უმცირესობების უფლებებზე უფრო მეტადაა გათვიცნობიერებული და მეტი მიმღებლობა აქვს.

"2018 წელს 33 %-დან 2021 წელს 47%-მდე გაიზარდა იმ ადამიანების წილი, რომლებიც ლგბტ თემის უფლებების დაცვას მნიშვნელოვნად მიიჩნევს. ასევე, იმ პირთა რაოდენობა, რომლებიც თვლიდნენ, რომ ლგბტ უფლებების დაცვა უმნიშვნელო იყო, შემცირდა 44%-დან 2018 წელს 29%-მდე 2021 წელს", — ვკითხულობთ კვლევაში.