9 თებერვალს იტალიის პარლამენტში ოკუპირებული აფხაზეთის "თვითგამორკვევაზე" პრესკონფერენცია გაიმართა. ღონისძიება სახელწოდებით, ხალხთა თვითგამორკვევის უფლება: შესათანხმებელ პრინციპებსა და იდენტობის დაცვას შორის, აფხაზეთი და დიდი ევროპა, დეპუტატ დალ’ოსოს მიერ იყო ინიცირებული და მას დისტანციურად ერთვებოდა ოკუპირებული აფხაზეთის დე ფაქტო პრეზიდენტი, ასლან ბჟანია.

საგარეო საქმეთა სამინისტროში აცხადებენ, რომ ამ საკითხზე საქართველოს საელჩოს იტალიში დიპლომატიური არხების მეშვეობით აქტიური კომუნიკაცია აქვს იტალიის მხარესთან. მათი თქმით, იტალია მტკიცედ უჭერს მხარს საქართველოს სუვერენიტეტს და ტერიტორიულ მთლიანობას.

"რაც შეეხება აღნიშნულ პოლიტიკოსს, მატეო დალ'ოსო, ცნობილია საოკუპაციო რეჟიმის წარმომადგენლებთან მჭიდრო კონტაქტებით. ის აქამდეც აქტიურად მონაწილეობდა რეჟიმის წარმომადგენლათა პროვოკაციულ ქმედებებში. პოლიტიკოსის აღნიშნულ ნაბიჯს ამჯერადაც მოჰყვება შესაბამისი რეაგირება ოფიციალური რომის მხრიდან", — ამბობენ უწყებაში.

ამასთან, საგარეო დეპუტატის პარტიის, Forza Italia-ს საპარლამენტო ჯგუფის ვიცე-პრეზიდენტის და საგარეო ურთიერთობებზე პასუხისმგებელი დეპუტატის, ვალენტინო ვალენტინის მიერ მედიისთვის მიწოდებულ განცხადებას ავრცელებს, სადაც ნათქვამია, რომ ეს დეპუტატის "გამოკვეთილად პირადი ინიციატივა" იყო, რაც არც პარტიის და არც სახელმწიფოს პოზიციას არ ასახავს.

"ჩვენი ქვეყნის მიერ მუდმივად გატარებულ პოლიტიკასთან თანხვედრაში, მტკიცედ ვუჭერთ მხარს საქართველოს ტერიტორიულ მთლიანობას და სუვერენიტეტს და არ ვაღიარებთ სამხრეთ ოსეთისა და აფხაზეთის რეგიონების დე ფაქტო ხელმძღვანელებს, და არც მათ წარმომადგენლებს, რომლებთანაც კონტაქტს არ მივიჩნევთ მართებულად", — ნათქვამია განცხადებაში.

უწყების თქმითვე, განცხადება გაავრცელა დეპუტატთა პალატის პრესცენტრმაც და აღნიშნა, რომ ღონისძიებაზე პასუხისმგებელი თავად დეპუტატია. მათი თქმით, პარლამენტის სასახლეში ცალკეული დეპუტატის მიერ ორგანიზებული პრესკონფერენცია არ იმართება არც დეპუტატთა პალატის და არც მისი თავმჯდომარის ეგიდით და მხარდაჭერით.