ჯანდაცვის მინისტრის, თამარ ბარკალაიას ინფორმაციით, 400-მდე თანამშრომლის გაფიცვის მიუხედავად სოციალური მომსახურების სააგენტოს ტერიტორიულ ერთეულებში მოქალაქეთა განცხადებების მიღება გრძელდება. მისი თქმით, სააგენტოში სულ 1 000-ზე მეტი თანამშრომელია და გაფიცულებთან მოლაპარაკების დროს მოქალაქეებისთვის სერვისების მიწოდებას არაგაფიცული თანამშრომლები უზრუნველყოფენ.

"ჩვენი მთავარი ამოცანა და მიზანი არის, რომ ჩვენს მოქალაქეებს სოციალური სერვისები არ შეუწყდეთ, რომელიც მათთვის მნიშვნელოვანი არის. ამის გარანტია ჩვენ დღეს გვაქვს. გვქონდა ძალიან მოკლევადიანი წყვეტა თბილისის ტერიტორიულ ერთეულებში, რომელიც აღდგა. შეგვიძლია ვთქვათ, რომ 67-ვე ტერიტორიულ ერთეულში განცხადებების მიღება ხდება უკვე

ჩვენი ტერიტორიული ერთეულების მიზანი არის, რომ პენსიონერები, სოციალურად დაუცველების განცხადებები იქნას მიღებული, რომელიც მერე უკვე დამუშავებას ექვემდებარება უკვე შესაბამისად ოფისებში. ამ განცხადებების მიღება არ შეწყვეტილა და არ შეწყდება, ჩვენ ვიზრუნეთ იმაზე, რომ ამ მოლაპარაკებების პროცესში ჩვენი მოქალაქეების სერვისები, ანუ მათ განცხადებით მომართვის შესაძლებლობა ჰქონოდათ", — განაცხადა ბარკალაიამ.

მისი თქმით, სააგენტოს ცენტრები, როგორც თბილისში, ისე რეგიონებში ხვალ, დილის 9 საათიდან ჩვეულ რეჟიმში გააგრძელებენ ფუნქციონირებას.

სოციალური სააგენტოს 400-მდე თანამშრომელი გაიფიცა. დღეს მათი პროტესტის პირველი დღეა. ისინი ანაზღაურების გაზრდასა და სამუშაო პირობების გაუმჯობესებას ითხოვენ. ჯანდაცვის სამინისტროსთან გამართული აქციის პარალელურად, სადაც სააგენტოს თანამშრომლები მინისტრთან შეხვედრას ითხოვდნენ, ზურაბ აზარაშვილმა მთავრობის კანცელარიის შენობაში ბრიფინგისას განაცხადა, რომ მათ ხელფასების ზრდას უკვე დაჰპირდნენ და გაზრდილი ანაზღაურება მათი შრომის ადეკვატურია.

ხელფასების ზრდის შესახებ განცხადება სააგენტომ ჯერ კიდევ გუშინ, გვიან ღამით, გაფიცვამდე რამდენიმე საათით ადრე გაასაჯაროვა. განცხადებაში ვკითხულობთ, რომ სოციალური აგენტის ხელფასი 250 ლარიდან 400 ლარამდე გაიზრდება, უფროსი სოციალური აგენტის კი 550 ლარიდან 700 ლარამდე. ასევე, ოჯახებში შესრულებული ვიზიტების ფარგლებში, ერთ შევსებულ დეკლარაციაზე სოციალური აგენტები 6 ლარის ნაცვლად 10 ლარს მიიღებენ.

გაფიცული თანამშრომლები შეთავაზებულ პირობებზე არ თანხმდებიან. მათი სურთ ანაზღაურების გაზრდა 100%-მდე, ასევე, რეგიონულ განყოფილებებსა და თბლისის ცენტრებში ერთი და იგივე პოზიციებზე დასაქმებულთა ანაზღაურების გათანაბრება. გარდა ამისა, ისინი ითხოვენ სამსახურეობრივი მოვალეობის შესრულებისას გაწეული ხარჯებს ანაზღაურებას და დამატებითი სამუშაოს დაკისრების შემთხვევაში, შესაბამისად, დამატებით ანაზღაურებას. სააგენტოს თანამშრომლებს, ასევე, სურთ ხელშეკრულებით განისაზღვროს ხელფასის ყოველწლიური კალკულაცია ინფლაციის კურსის გათვალისწინებით. მოთხოვნები ეხება სააგენტოს ცენტრებში დასაქმებულ პირთა რაოდენობის ზრდას, რათა "არ მოუწიოს დასაქმებულს სხვა დამატებითი პოზიციების ფუნქცია მოვალეობის შეთავსება".