ნაციონალური მოძრაობის თავმჯდომარის, ნიკა მელიას განცხადებით, პარტია ძალიან ახლოსაა იმ გადაწყვეტილებამდე, რომ პარლამენტში შევიდნენ, თუმცა აქვე ამბობს, რომ არასერიოზული იქნება, თუ მხოლოდ საგამოძიებო კომისიების შესაქმნელად შევლენ. მელიას აზრით, მათ უნდა იბრძოლონ და ბრძოლის ყველა ასპარეზი აითვისონ.

"ჩვენ ამ მიმართულებით აქტიურად ვმუშაობათ და ახლოს ვართ ამ გადაწყვეტილების მიღებასთან, ძალიან ახლოს ვართ [...] რა თქმა უნდა, მხოლოდ ამ საქმიანობისთვის შესვლა და მერე გამოსვლა, თუკი რამე შეიძლება არასერიოზული აღმოჩნდეს, ეს აღმოჩნდება არასერიოზული", — თქვა მან.

მელია აღნიშნავს, რომ სავარაუდოდ, სახელმწიფო უსაფრთხოების სამსახურის ფაილებზე საგამოძიებო კომისიის შექმნის წინააღმდეგი თავადვე იყო, თუმცა ეს იმას არ ნიშნავს, რომ გადაწყვეტილებები არ უნდა გადაიხედოს.

"დროსა და სივრცეში შენ ვითარება გკარნახობს, რომ უნდა მოიქცე სხვაგვარად, თუნდაც ისე, რასაც არ ფიქრობდი რამდენიმე თვით ადრეც. ვფიქრობ, რომ თუ ჩვენ იქ შევდივართ საგამოძიებო კომისიის შესაქმნელად და ამ მიმართულებითაც, ჩვენ გქვონდა განსხვავებული პოზიცია ოპოზიციური პარტიებისგან. მათ შორის, მე პირადად, ტყუილი რატომ უნდა ვთქვა, მე ვიყავი პირადად, წინააღმდეგი, რომ მაშინ ჩვენ საპარლამენტო საქმიანობაში კომისიის შექმნისთვის ხელი შეგვეწყო. თუ არ ვცდები ლილუაშვილთან დაკავშირებული კომისია იყო, უკანონო მოსმენების, მაგრამ ეს იმას არ ნიშნავს, რომ ჩვენ დღეს არ გადავხედოთ ჩვენს გადაწყვეტილებას", — განაცხადა მან.

11 იანვარს ნაციონალური მოძრაობის დეპუტატმა, რომან გოცირიძემ თქვა, რომ პარტია აქტიურად უნდა ჩაერთოს საპარლამენტო საქმიანობაში, ან საერთოდ დატოვოს საკანონმდებლო ორგანო. მისი შეფასებით არსებული მოცემულობა — ბოიკოტის რეჟიმში ყოფნა — ყველაზე უარესი მდგომარეობაა.

გარდა ამისა, მას შემდეგ, რაც პარლამენტმა სახელმწიფო ინსპექტორის სამსახურის კანონპროექტის გადაწყვეტილება მიიღო, პარტიის ერთ-ერთი ლიდერმა, ხატია დეკანოიძემ განაცხადა, რომ ამ პროცესში ენმ-ის პარლამენტში არყოფნა შეცდომა იყო.