სახელმწიფო ინსპექტორმა, ლონდა თოლორაიამ განაცხადა, რომ პრეზიდენტის მხრიდან სახელმწიფო ინსპექტორის გაუქმების კანონპროექტზე ვეტოს მოლოდინი არსებობდა.

"ვეტოს მოლოდინი არსებობდა, მოლოდინი გააჩინა მისმა საკმაოდ მწვავე განცხადებამ, რომელიც მან გაავრცელა რამდენიმე დღის წინ, რისთვისაც მე მას ვუხდი კიდევ ერთხელ ძალიან დიდ მადლობას და რა თქმა უნდა, ამ ფონზე არსებობდა მოლოდინი იმისა, რომ იგი გამოიყენებდა ამ ვეტოს უფლებას.

არ ვიცი, ალბათ, უფრო კონკრეტულად მას უნდა ვკითხოთ რა გახდა ვეტოს გამოუყენებლობის მიზეზი იმ ფონზე, როდესაც დღევანდელ გავრცელებულ განცხადებაში, ასევე, თავად ხედავს არაერთ პრობლემას ამ კანონის მიღებასთან დაკავშირებით და პრობლემები, რომელზეც ის საუბრობდა პირველ განცხადებაში, რეალურად პრობლემად დარჩა, ასევე, ამ შემთხვევაში, ამიტომ თავისთანად ცხადია, ამ ვეტოს მოლოდინი არსებობდა", — განაცხადა მან ფორმულას ეთერში.

პრეზიდენტმა ინსპექტორის სამსახურის გაუქმების კანონს ვეტო არ დაადო. სალომე ზურაბიშვილის განცხადებით, ამგვარი სტრუქტურული ცვლილებების მიმართ არსებობდა და არსებობს განსხვავებული შეხედულებები, თუმცა ეს გადაწყვეტილება არ შეიცავს თავისთავად კატეგორიული ხასიათის სამართლებრივ წინააღმდეგობას.