სახალხო დამცველის, ნინო ლომჯარიას განცხადებით, მის პრაქტიკაში პირველი შემთხვევაა, როდესაც მისი წარმომადგენელი დაკავებულთან არ შეუშვეს. მისი თქმით, უკვე დაწყებულია შესაბამისი პროცედურები და გატარდება კანონმდებლობით გათვალისწინებული სანქციები.

"პირველი შემთხვევაა ჩემი პრაქტიკის განმავლობაში, როდესაც დაკავებულ პირთან ჩემს წარმომადგენლებს, რწმუნებით ხელში აღჭურვილ წარმომადგენლებს, არ მიეცათ შესვლის შესაძლებლობა. ეს წარმოადგენს სახალხო დამცველის უფლებამოსილებას და მანდატის, რა თქმა უნდა, დარღვევას და ჩვენ დაწყებული გვაქვს შესაბამისი პროცედურები. ვიხელმძღვანელებთ ორგანული კანონით და პასუხისმგებელი პირების მიმართ შესაბამისად გავატარებთ იმ სანქციებს, რასაც ითვალისწინებს ქართული კანონმდებლობა", — თქვა ლომჯარიამ.

გუშინ, 29 დეკემბერს სახალხო დამცველის წარმომადგენელი, საბა ბრაჭველი გორის ჰოსპიტალში მიხეილ სააკაშვილთან არ შეუშვეს. მისი განცხადებით, სურდა გაცნობოდა სააკაშვილის ჯანმრთელობის მდგომარეობას და შეხვედროდა მკურნალ ექიმს, ნინო გოგორიშვილს. ომბუდსმენის წარმომადგენლის თქმით, ამაზე მიიღო პასუხი, რომ გოგორიშვილს ჯანმრთელობის პრობლემები ჰქონდა.