უკრაინის პარლამენტმა სამშაბათს დაამტკიცა კანონპროექტი, რომლის საშუალებითაც 2022 წელს ქვეყნის ტერიტორიაზე უცხოურ ძალებს უფლება ეძლევათ მიიღონ სამხედრო წვრთნებში მონაწილეობა.

უკრაინის პრეზიდენტის, ვოლოდიმირ ზელენსკის მიერ წარდგენილი კანონპროექტის მიხედვით, ქვეყანა მომავალ წელს 10 სამხედრო წვრთნას გეგმავს.

უკრაინის თავდაცვის მინისტრის მოადგილემ, ანატოლი პეტრენკომ კენჭისყრამდე პარლამენტს განუცხადა, რომ 21 000 უკრაინელი და 11 500 სამხედრო პერსონალი შეერთებული შტატებიდან, ბრიტანეთიდან, პოლონეთიდან, რუმინეთიდან და სხვა ქვეყნებიდან მიიღებენ ამ წვრთნებში მონაწილეობას ხმელეთზე, ზღვასა და ჰაერში.

"ამ ტერიტორიაზე მრავალეროვნული წვრთნების ჩატარება ხელს შეუწყობს ეროვნული თავდაცვის შესაძლებლობების გაძლიერებას და რეგიონში სტაბილურობის შენარჩუნებისთვის პოლიტიკური და დიპლომატიური ძალისხმევის მხარდაჭერას", — თქვა პეტრენკომ.

აშშ-მ და მოკავშირე ოფიციალურმა პირებმა განგაში ჯერ კიდევ გასულ თვეს ატეხეს. ამერიკული დაზვერვის წარმომადგენლებმაც მოკავშირეები გააფრთხილეს, რომ ცოტა დრო დარჩა, რათა რუსეთს უკრაინაში სამხედრო მოქმედებების განხორციელებაში ხელი შეუშალონ. აშშ-მ ევროპულ ქვეყნებს მოუწოდა შეერთებულ შტატებთან იმუშაონ, რათა მოსკოვის შეკავების მიზნით ეკონომიკური და სამხედრო ზომების პაკეტი შეიმუშაონ.

უკრაინის თავდაცვის სამინისტრომ ნოემბრის დასაწყისში განაცხადა, რომ მის საზღვართან დაახლოებით, 90 000 რუსი ჯარისკაცი გადაისროლეს. გაურკვეველი იყო, რამდენი მათგანი იყო ადგილზე ახლად განლაგებული.