ფიქრები ამინდზე და ცარიელ მაცივარზე,

შიმშილზე გაკრულები ვართ, როგორც ღმერთი ჯვარზე

ამ ტექსტით იწყება ერეკლე დეისაძის ახალი სიმღერა ცეცხლი უკიდია ყველაფერს, რომელიც ქართველი მომღერლის ახალი ალბომის ამ ენით ამენ ნაწილია.

მსმენელს ალბომის სრულად მოსმენა 25 დეკემბერს შეეძლება, იქამდე კი შესაძლებლობა გვაქვს, ალბომიდან პირველი ჩანაწერი შევაფასოთ, თანაც შთამბეჭდავ ვიდეოკლიპთან ერთად, რომლის პრემიერაც სულ რამდენიმე საათის წინ შედგა.

ქართველი მწერალი და მუსიკოსი ერეკლე დეისაძე თავის შემოქმედებაში გამორჩეული ენითა თუ ხედვით ყოველთვის ამახვილებდა ყურადღებას მწვავე სოციალურ თემებზე: მაგალითად, ალბათ, ბევრს კარგად ახსოვს მისი ისეთი გახმაურებული სიმღერები, როგორებიცაა სისტემა უნდა დაინგრეს და რაც მამას უნდა.

ქვეყანა გაღარიბდა, დაკარგა ძალა ყნოსვის,

ხალხს აღარ სჯერა ბოსის, არცერთი ბარბაროსის,

აქედან მაღლა რომ ზის, სამების კალატოზის,

რომელმაც იცის გემო ახალი მეტამორფოზის

სიმღერაზე ცეცხლი უკიდია ყველაფერს გადაღებულ ვიდეოკლიპში საახალწლო განწყობა იგრძნობა, ოღონდ დამთრგუნველი, მძიმე და შემზარავი ატმოსფეროთი.

ცუდი ფიქრების გამო რომ იჭერდნენ, ალბათ, მე ჩამაყუდებენ ციხეში

ფაქტებად მერე ლექსებს ამომიღებდნენ, თავისუფლება კვდება სიღარიბეში

ვიდეოკლიპის რეჟისორია avi musaifi, სცენარის ავტორი მინდია არაბული, არტდირექტორი მარიამ საკნელაშვილი, ხოლო პროდიუსერი ნიკა ქუცნიაშვილი.