გერმანულენოვანი ქართველი მწერალი, დრამატურგი და თეატრის რეჟისორი ნინო ხარატიშვილი ხელისუფლებას ექსპრეზიდენტ მიხეილ სააკაშვილის სამოქალაქო კლინიკაში გადაყვანისკენ მოუწოდებს.

"რატომ არ გვინდა წარსულმა რაიმე გვასწავლოს, საკუთარმა შეცდომებმა ოდნავ მაინც თვალები აგვიხილოს, ცოტათი უკეთესები მაინც გავხდეთ, რატომ არ გვინდა?!!!!! ორი ადამიანის სიცოცხლე საფრთხეშია. წერტილი. ამიტომ #გადაიყვანეთ!", — წერს ხარატიშვილი Facebook-ზე.

ექსპრეზიდენტი მიხეილ სააკაშვილი ამჟამად გლდანის ციხის საავადმყოფოში იმყოფება. ის მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში 8 ნოემბერს გადაიყვანეს. სააკაშვილი 48-ე დღეა შიმშილობს.

სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.