ქართული ოცნების დეპუტატის, შალვა პაპუაშვილის განცხადებით, უკრაინის სახალხო დამცველის იურისდიქცია საქართველოში არ ვრცელდება და უკრაინის მიღმა ლუდმილა დენისოვა კერძო პირია. ასე გამოეხმაურა ის მიხეილ სააკაშვილთან ომბუდსმენის არშეშვებას.

"არავის ხომ არ გინახავთ, რომ საქართველოს სახალხო დამცველი წასულიყო სხვა ქვეყანაში და საქართველოს მოქალაქეების ინტერესებზე ეზრუნა. ისევე, უკრაინის ომბუდსმენს არანაირი იურისდიქცია არ აქვს, ის საქართველოში არ არის ომბუდსმენი, ის გახლავთ კერძო პირი, უკრაინის მოქალაქე, რომელიც ჩამოსულია საქართველოში. მისი ამოცანა არ არის საქართველოს სახელმწიფოსგან უკრაინის მოქალაქის დაცვა. ეს ამოცანა გააჩნია კონსულს, საგარეო საქმეთა სამინისტროს, რომელსაც აქვს სრული წვდომა და შესაძლებლობა, შეხვდეს სააკაშვილს. რაც შეეხება ომბუდსმენს, მისი ამოცანა გახლავთ უკრაინის ტერიტორიაზე ნებისმიერი ადამიანის უფლებების დაცვა, არამხოლოდ მოქალაქის", — განაცხადა პაპუაშვილმა.

მანვე დასძინა, რომ ექსპრეზიდენტს დღის განმავლობაში საშუალოდ 5-10 ვიზიტორი ჰყავს და ზოგადად მონახულების პრობლემა არ არსებობს.

უკრაინის სახალხო დამცველი, ლუდმილა დენისოვა უკრაინის მოქალაქისა და საქართველოს ექსპრეზიდენტ მიხეილ სააკაშვილის სანახავად ციხეში არ შეუშვეს. ამ თემაზე დასმული კითხვის პასუხად, იუსტიციის მინისტრი რატი ბრეგაძე აცხადებს, რომ გლდანის #18 დაწესებულება სამკურნალოა და თავს იკავებენ იქ შეუშვან ის ადამიანები, ვისაც საქართველოს კანონმდებლობით ამის უფლება არ აქვს.