ქართული ოცნების თავმჯდომარე ირაკლი კობახიძე აცხადებს, რომ თუ ოპოზიციას ექნება საბოტაჟის მცდელობა, ისინი კანონის ფარგლებში უმკაცრეს პასუხს მიიღებენ. მისი თქმით, "აგრესიული სახეები" ყველას მობეზრდა და მათ შორის, ოპოზიციის მხარდამჭერებსაც.

"კანონის შესაბამისად, მიიღებენ უმკაცრეს პასუხს, ნებისმიერ მცდელობაზე, განახორციელონ საბოტაჟი, შექმნან არეულობის პატარა კერები, ნებისმიერ ასეთ მცდელობაზე მიიღებენ კანონის ფარგლებში უმკაცრეს პასუხს", — განაცხადა კობახიძემ იმედის ეთერში.

ამასთანავე, მან ირონიულად აღნიშნა, რომ "6 ნოემბერს, 6 საათზე, ეცდებიან 6 000 კაცი შეკრიბონ" და აქვე დასძინა, რომ ამით ოპოზიციის "კოდი გაშიფრეს".

ოპოზიციის აქცია თბილისში 6 ნოემბერს გაიმართება. 31 ოქტომბერს ოპოზიციამ ცესკოს მიერ არჩევნების მეორე ტურის შედეგების გამოქვეყნების შემდეგ აქცია გამართა. თბილისის მერობის კანდიდატმა, ნიკა მელიამ პარლამენტთან შეკრებილებს სამოქმედო გეგმა გააცნო. მისი თქმით, უკან დახევას არ აპირებენ. მთელი კვირის განმავლობაში ოპოზიცია დიდ ქალაქებში აქციებს მართავს.