საქართველოს თავდაცვის სამინისტროს სამხედრო პოლიციის ყოფილმა ხელმძღვანელმა, მეგის ქარდავამ სასამართლო პროცესი პროტესტის ნიშნად დატოვა. ქარდავამ სხდომაზე განაცხადა, რომ ის ბრალდებებს არ აღიარებს.

"მე, ჩემი ძმა და ჩემი მეგობრები ვიცავდით საქართველოს უსაფრთხოებასა და სტაბილურობას. სწორედ ასეთი საქმეების საფუძველზე გათავისუფლდა ათასობით კეთილსინდისიერი და ღირსეული, როგორც ოფიცერი, ასევე, სხვა საჯარო მოხელე, რამაც გამოიწვია ქვეყანაში სტაბილურობისა და უსაფრთხოების მოშლა.

სწორედ, განსაკუთრებით, სამეგრელოსა და ოკუპირებული აფხაზეთის ადმინისტრაციულ საზღვართან, რისი შედეგიც არის არა მხოლოდ კვარაცხელია-ოთხოზორიას სიკვდილი, არამედ იმ ათასობით ადამიანის სიკვდილი, დაყაჩაღება, გატაცება ფულის გამოძალვის მიზნით, წამება და არაადამიანური მოპყრობა, რომელიც დღესაც მიმდინარეობს. მაგრამ ყოველივე ამის პრევენციის არანაირი პოლიტიკური ნება არ არსებობს, მაგრამ არსებობს პოლიტიკური ნება და პოლიტიკური დევნა იმ ადამიანების მიმართ, რომლებიც იცავდნენ საქართველოს უსაფრთხოებასა და სტაბილურობას

ეს ყოველივე არის პოლიტიკურად მოტივირებული და ეს საქმეები არაფრით განსხვავდება გასული საუკუნის 50-იანი წლების ე.წ. მებრძოლთა საქმისგან. როგორც იქ, აქაც ყველა მტკიცებულება არის გაყალბებული, ჩვენებები მიღებულია შურისძიების, პირადი მოტივის, შანტაჟის, ფიზიკური ძალადობის, წამებისა და არაადამიანური მოპყრობის საფუძველზე [...] გამომდინარე იქიდან, რომ არანაირი ნდობა არ გამაჩნია იმისა, რომ აქ აღსრულდება მართლმსაჯულება, დადგება ჭეშმარიტი და ობიექტური განაჩენი, მე პროტესტის ნიშნად ვტოვებ დარბაზს.

მე ვიცი და მჯერა, რომ მალე დადგება საქართველოში დრო და ის ადამიანები, ვინც ჩემი, ჩემი ძმისა და ჩემი მეგობრების წინააღმდეგ მონაწილეობდნენ პოლიტიკურ დევნაში, იყვნენ მათი შემკვეთები და შემსრულებლები, წარდგებიან არა ჩინჩალაძე-მურუსიძის სასამართლოში, არამედ ქართველი ხალხის სამსჯავროზე, ვერ დაიმალებიან ვერც მოსკოვში, ვერც პარიზში, ვერც მილანში, ვერც ნიუ-იორკში თუნდაც", — განაცხადა მან.

როგორც პროკურომა, დავით კიკაჩეიშვილის ჟურნალისტებთან სხდომის დაწყებამდე განაცხადა, დღევანდელ პროცესზე განიხილებოდა სამი პატიმრის წამების საქმე.

"საქართველოში მის მიმართ არსებული 11 სისხლის სამართლის საქმიდან 5-ზე უკვე არსებობს გამამტყუნებელი განაჩენი [...] მიმდინარე 6 საქმიდან ერთ-ერთი გახლდათ დღევანდელი, რაც შეეხება პენიტენციურ დაწესებულებაში სამი პატიმრის წამების ფაქტს", — თქვა მან.

მომდევნო სხდომა თბილისის საქალაქო სასამართლოში 29 ნოემბერს 15:00 საათზე გაიმართება.

მეგის ქარდავას ექსტრადაცია 17 სექტემბერს განხორციელდა. საქართველოს ხელისუფლება მეგის ქარდავას ექსტრადირებას რამდენიმე წელია ითხოვდა. მან საქართველო 2012 წელს, ხელისუფლების ცვლილების შემდეგ დატოვა.

ქარდავას უკრაინაში დაკავების შესახებ ინფორმაცია 2017 წელს გავრცელდა. იქამდე, ის ინტერპოლით წითელი ცირკულარით იძებნებოდა.

სამხედრო პოლიციის ყოფილი ხელმძღვანელის მიმართ საქართველოში არსებული 11 სისხლის სამართლის საქმიდან ხუთზე გამამტყუნებელი განაჩენია გამოტანილი, ხოლოდ 6 სისხლის სამართლის საქმე თბილისის საქალაქო სასამართლოში იხილება.

სააპელაციომ საქალაქო სასამართლოს გადაწყვეტილება, რომელმაც სერგო თეთრაძის წამების საქმეზე ქარდავა გაამართლა, შეცვალა და ყოფილ მაღალჩინოსანს პატიმრობა მიუსაჯა. მას დაუსწრებლად ცხრა წლით თავისუფლების აღკვეთა აქვს შეფარდებული. სასამართლოს გადაწყვეტილებით, ის დამნაშავედ სცნეს 144-ე და 138-ე მუხლებით, რაც სექსუალური ხასიათის ძალმომრეობასა და წამებას გულისხმობს.