ქართული ოცნების დეპუტატის, გიორგი ამილახვარის განცხადებით, "500 აქტივისტი რომ შეიკრიბება გარკვეულ აქციაზე", მისი აზრით არანაირი მნიშვნელობა არ აქვს რა განცხადებებს გააკეთებენ ისინი იქ. მიუხედავად ამისა ის ამბობს, რომ აქციები ყოველთვის იქნება საქართველოში, რადგან ეს "დემოკრატიის ნაწილია".

"ამ დღეების განმავლობაში, ხშირად მეკითხებოდნენ, მესამე პრეზიდენტის შიმშილობაზე, ოპოზიციის მიერ გასამართ აქციებზე, იმ დაპირისპირებაზე მელიასთან, რაც არჩევნების დღეს მოხდა, თუ რას ვუპასუხებთ ჩვენ ამას. ჩვენი პასუხი არის არაფერი. ჩვენ უნდა დავანებოთ ამ საკითხებს თავი, ვაცადოთ მესამე პრეზიდენტს, წყნარად მშვიდად, კომფორტულად მოიხადოს თავისი სასჯელი საპატიმროში.

აქციები ყოველთვის იმართებოდა ამ ქვეყანაში და ყოველთვის გაიმართება, ეს არის დემოკრატიის ნაწილი, მაგრამ 500 აქტივისტი რომ შეიკრიბება გარკვეულ აქციაზე, მე ვფიქრობ, არანაირი მნიშვნელობა არა აქვს, ისინი იქ რა განცხადებებს გააკეთებენ. არც მე არ მომეწონა, ცხადია, მელიასთან დაპირისპირება, მაგრამ როდესაც გაყენებენ შეურაცხყოფას და აწყობენ პროვოკაციას, ბუნებრივია, პასუხიც იქნება ადეკვატური", — განაცხადა მან პარლამენტის პლენარულ სხდომაზე.

მისი თქმით, მათ ვისაც არ სურს განახორციელოს ხალხის ნება, მათი ადგილი არ არის საკანონმდებლო ორგანოს დაბრაზში. ამილახვარის განცხადებით, "ქუჩის პოლიტიკოსებმა თავიანთ ბუნებრივ ადგილსამყოფელში" უნდა გადაინაცვლონ და დატოვონ პარლამენტის დარბაზი.

30 ოქტომბერს საქართველოში ადგილობრივი თვითმმართველობის არჩევნები ჩატარდა. ცესკომ წინასწარი შედეგები გამოაქვეყნა, რის მიხედვითაც წალენჯიხა ერთადერთი მუნიციპალიტეტია, სადაც ოპოზიციის კანდიდატი იგებს. სხვა დიდ ქალაქებსა და თვითმმართველ თემებში მმართველი გუნდის კანდიდატები იგებენ ან ლიდერობენ.

შედეგებთან დაკავშირებით განცხადება გააკეთა ოპოზციის თბილისის მერობის კანდიდატმა თბილისში, ნიკა მელიამ და არჩევნებს "გაუქმებული" უწოდა. მისი თქმით, ბევრ მუნიციპალიტეტში ოპოზიციის მოპოვებული გამარჯვება ქართული ოცნების დამფუძნებელმა, ბიძინა ივანიშვილმა მოიპარა და "ვითომც არ იყო მოპოვებული ისე წაიღო, საკუთარ სხვადასხვა რეზიდენციებში".

ამის შემდეგ, ოპოზიციამ აქციები დააანონსა მთელი საქართველოს მასშტაბით. დღეს, 2 ნოემბერს ოპოზიციის მხარდამჭერები ბათუმსა და რუსთავში შეიკრიბებიან. ხვალ კი აქცია იქნება ზუგდიდშიც. რაც შეეხება დედაქალაქს, თბილისში აქცია 6 ნოემბერს ჩატარდება.

მიხეილ სააკაშვილი პენიტენციურ დაწესებულებაში უკვე 33 დღეა შიმშილობს. მან შიმშილობა დაკავების დღიდან გამოაცხადა. 29 ოქტომბერს ექსპრეზიდენტმა თქვა, რომ ის უარს ამბობს ექიმთა კონსილიუმთან თანამშრომლობაზე. მისი თქმით, ის აღარ ჩააბარებს ანალიზებს და არ მიიღებს შიმშილობის შემამსუბუქებელ მკურნალობას.

მანამდე, 28 ოქტომბერს სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

ექსპრეზიდენტის სამოქალაქო კლინიკაში გადაყვანის შესახებ ხელისუფლებას მოუწოდებენ პოლიტიკური პარტიები, ორგანიზაციები, სამედიცინო მუშაკები. თუმცა ისინი ამაზე უარს ამბობენ და აცხადებენ, რომ პენიტენციურ დაწესებულებაში შექმნილია ყველა პირობა იმისთვის, რომ პატიმარს უმკურნალონ. იუსტიციის მინისტრის, რატი ბრეგაძის თქმით, საჭიროების შემთხვევაში სააკაშვილს სწორედ ციხის სამედიცინო განყოფილებაში გადაიყვანენ. ამის წინააღმდეგია ექსპრეზიდენტი და ამბობს, რომ როგორიც არ უნდა იყოს მისი ჯანმრთელობის მდგომარეობა, უარს აცხადებს ციხის საავადმყოფოში გადაყვანაზე.