ქართული ოცნების აღმასრულებელი მდივანი, მამუკა მდინარაძე ამბობს, რომ საქართველოში გამარჯვებულიც და დამარცხებულიც გამარჯვებას ზეიმობს. ამ შემთხვევაში მდინარაძე განმარტავს, რომ ენმ-ს მხარდამჭერები "ოცნების" გამარჯვებითაც კმაყოფილნი უნდა იყვნენ, რადგან იცხოვრებენ ქვეყანაში, რომელიც "პროგრესისკენ იღწვის".

"კი, მართალია, საქართველო ალბათ ერთადერთი ქვეყანაა, სადაც გამარჯვებული და დამარცხებულიც გამარჯვებას ზეიმობს და ყველა გამარჯვებულია. მაგრამ მართლა ყველა გამარჯვებულია, ნაცმოძრაობის მომხრეებიც გამარჯვებულები არიან, იმიტომ რომ ისინი იცხოვრებენ რეალურად ისეთ ქვეყანაში და რეალურად ისეთ საქართველოში, რომელიც მართლა პროგრესისკენ იღწვის. რომელიც ევროპისკენ მიისწრაფვის. რომელშიც სტაბილურობა და სიმშვიდე იქნება და განვითარებაზე ორიენტირებული ხელისუფლება იქნება მომდევნო წლების განმავლობაში, ამიტომ მათაც ვულოცავ", — თქვა მდინარაძემ.

30 ოქტომბერს საქართველოში თვითმმართველობის არჩევნების მეორე ტური გაიმართა. უკვე გამოქვეყნდა ეგზიტპოლის ორი განსხვავებული შედეგი. მთავარი არხის ეგზიტპოლით, ოპოზიცია მეორე ტურში ყველა დიდ ქალაქში იგებს. ამ კვლევის მიხედვით თბილისში ნიკა მელიამ 51% მიიღო, ქართული ოცნების კანდიდატმა, კახა კალაძემ კი — 49%. რაც შეეხება ტელეკომპანია იმედის დაკვეთით ჩატარებულ ეგზიტპოლის შედეგების, ამ კვლევის მიხედვით 4 დიდ ქალაქში მმართველი გუნდის კანდიდატები იგებენ. იმედის ეგზიტპოლით თბილისში კახა კალაძემ აიღო 57,2%, ხოლო კახა კალაძემ — 42,8%.