დროას ლიდერის, ელენე ხოშტარიას განცხადებით, ვაკეში ერთ-ერთი უბნის გადათვლის შედეგად აღმოჩნდა, რომ 0 ხმის ნაცვლად, 20 ხმა ჰქონდათ. ამის შესახებ მან საკუთარ Facebook-ზე დაწერა.

"ვაკეში 72-ე უბანზე, გადათვლის შედეგად აღმოჩნდა, რომ სადაც გვეწერა 0 ხმა, გვქონია 20. უნდა გადავათვლევინოთ ყველაფერი", — წერს ის.

On.ge აღნიშნულთან დაკავშირებით ცენტრალურ საარჩევნო კომისიასაც დაუკავშირდა. მათ პასუხს მიღებისთანავე შემოგთავაზებთ.

დღეს ცესკომ გაავრცელა ინფორმაცია, რომ გადათვლილი 360 საარჩევნო უბნიდან "მცირედით არის შეცვლილი" 121 უბნის მონაცემები. ცესკოში აცხადებენ, რომ გადათვლის შედეგად შეცვლილ მონაცემებს არჩევნების შედეგზე გავლენა არ მოუხდენია.

"იყო ხარვეზებიც, რომელიც გადათვლის შედეგად გამოვლინდა და, რა თქმა უნდა, შესაბამისი ცვლილება განხორციელდა მონაცემებში. ცალკეულ კანდიდატებს მცირედით მოემატათ ან დააკლდათ ხმათა რაოდენობა, თუმცა ამას საერთო შედეგზე გავლენა არ მოუხდენია", — აცხადებენ ცესკოში.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.